Ստամբուլի Երիտասարդական հիմնադրամի շենքի մոտ պայթյուն է որոտացել: Այդ մասին լուրը հաղորդում է RIA-Novosti-ն։

Լրատվական գործակալությունը հայտնում է, որ ըստ տեղի իշխանությունների՝ պայթյունի վայրում  հայտնաբերվել են ինքնաշեն պայթուցիկի բեկորներ:

Ստամբուլի նահանգապետարանի հայտարարության մեջ ասվում է.

«Այսօր ժամը 06:00-ի սահմաններում Գազիոսմանփաշա թաղամասի Հյուրրիյեթ Մահալլեսի փողոցի Թուրքիայի երիտասարդական հիմնադրամի մասնաճյուղի դիմաց պայթյունի մասին ահազանգ է ստացվել: Ըստ տեղում գործող անվտանգության ծառայության աշխատակիցների հայտնած նախնական տեղեկության՝ շենքում ապակիներ են կոտրվել, զոհեր և վիրավորներ չկան:

Դեպքի վայրի զննության ժամանակ հայտնաբերվել են ինքնաշեն պայթուցիկ սարքերի բեկորներ, դեպքի առթիվ հարուցվել է դատավարական և վարչական հետաքննություն»:

Star թերթն էլ հայտնում է, որ հսկողության տեսախցիկներն ուսումնասիրելուց հետո իրավապահները պարզել են, որ անհայտ կինը վաղ առավոտյան եկել է Երիտասարդական հիմնադրամի շենքի մուտքի մոտ և այնտեղ ինքնաշեն պայթուցիկներ թողել։ Ոստիկանությունը գործողություններ է սկսել կասկածյալին ձերբակալելու համար։