ՀՀ գլխավոր դատախազությունն անդրադարձել է ԱԺԲ-ի կողմից ՀՅԴ-ի՝ Երևանի Ֆրանսիայի հրապարակում տեղադրած Արցախի դրոշի վրայի սպիտակ գծերը ներկելուն և տեղեկացրել, որ համացանցում հայտնված տեսանյութն ուղարկվել է ոստիկանություն:
«Մամուլում տեսանյութ է հրապարակվել և շրջանառվել մի քանի անձի կողմից Արցախի Հանրապետության պետական դրոշը ներկելու բովանդակությամբ:
Այդ տեսանյութն արձանագրվել է ՀՀ գլխավոր դատախազության կողմից՝ ԶԼՄ մշտադիտարկման արդյունքում, և ուսումնասիրվել է: Արդյունքում այն ուղարկվում է ՀՀ ոստիկանություն՝ քրեադատավարական կարգով նյութեր նախապատրաստելու, դրա շրջանակներում դեպքի հանգամանքները պարզելու և հետագա ընթացքը որոշելու հանձնարարությամբ»,- ասվում է հայտարարության մեջ:
Հիշեցնենք՝ «Ազգային-ժողովրդավարական բևեռ»-ի անդամները Ֆրանսիայի հրապարակում ՀՅԴ-ի տեղադրած Արցախի դրոշի սպիտակ գծերը այսօր առավոտյան ներկել էին՝ այդպիսով վերածելով ՀՀ դրոշի: Այնուհետև Ազգային-ժողովրդավարական բևեռի խորհուրդը հայտարարություն էր տարածել՝ տեղեկացնելով, որ Ազատության հրապարակում հերթապահող ԱԺ Բևեռի աջակիցներին են մոտեցել ՀՅԴ երկու անդամներ, որոնցից մեկը Իգոր Սարգսյան անուն-ազգանունով, և պահանջել վերականգնել Ֆրանսիայի հրապարակում իրենց տեղադրած Արցախի դրոշը: Հակառակ դեպքում կես ժամ հետո կվերադառնան և հաշվեհարդար կտեսնեն։ Ավելի ուշ ՀՅԴ երիտասարդները Ֆրանսիայի հրապարակում փոխել էին դրոշը և կրկին տեղադրել Արցախինը: