Ֆրանսիայում խաղաղ հայ ցուցարարներին մուրճով հարվածելուց հետո չհանգստացած թուրք ազգայնականների ամբոխը գիշերը դուրս է եկել Լիոնի փողոցներ, անկարգություններ արել, հայերին ուղղված սպառնալիքներ հնչեցրել: Թուրքերի ամբոխը փնտրել է հայերի, հնչեցրել տարատեսակ սպառնալիքներ, բարձրացրել Թուրքիայի դրոշը:
Լիոնի բնակիչներից Նատալի Բիանկոն «Ֆեյսբուք»-ի իր էջում գրել է. «Ընդամենը մի քանի րոպեում մենք տեսանք, թե ինչպես են հարյուրավոր թուրք երիտասարդներ ալեկոծում քաղաքի կենտրոնը, բացում դրոշներ, բեյսբոլի մահակներ, ձողեր և ծուխ: Նրանք ներխուժեցին քաղաքի կենտրոն ՝ գոռալով «մահ՝ հայերին», «Ալլահ Աքբար» և այլ կարգախոսներ: Նրանք ակնհայտորեն կռիվ էին փնտրում և սպառնում էին անցորդներին, ովքեր համարձակվում էին նայել նրանց»:
Հավաքվածներից շատերը ձեռքերով ցույց են տվել գորշ գայլի ՝ թուրքական ծայրահեղ ազգայնականների նշանը: Եկել է նաև ոստիկանական մեքենա: Ականատես բնակիչը նշել է՝ ցնցված է կես ժամ տևած այդ «պատերազմից»:
Նույն օրը՝ հոկտեմբերի 28-ի առավոտյան Ֆրանսիայում հայերի խաղաղ ակցիայի ընթացքում նրանց վրա մուրճով և դանակով հարձակվել էին թուրքեր
Ֆրեզնոյի հյուսիսում հոկտեմբերի 28-ի երեկոյան ի աջակցություն Հայաստանի խաղաղ ցույցն ավարտվել է երեք մարդու հոսպիտալացմամբ, որոնք ստացել էին դանակի հարվածներ: «Արմենպրես»-ի հաղորդմամբ՝ այս մասին հայտնում է ամերիկյան «ABC30 news» հեռուստաալիքը: Բանն այն է, որ Blackstone և Nees փողոցների խաչմերուկում՝ «River Park» առևտրի կենտրոնի մոտ, 150 հայ ցուցարարներ «Պաշտպանեք Հայաստանը» անվանումով ակցիայի շրջանակում արգելափակել էին Blackstone փողոցի դեպի հյուսիս գնացող ուղղությունը: Ոստիկանի խոսքով՝ այդ ժամանակ վարորդներից մեկը դուրս է եկել մեքենայից, մոտեցել ցուցարարներին ու խոսել նրանց հետ: Կատարինա Մելիքյանն ասել է, որ բարկացած վարորդը մեղադրել է իրենց ու սպառնացել վնասել մեքենաներն ու նաև սպանել ցույցի մասնակիցներին: Վկաներից մեկի նկարահանած տեսանյութից երևում է, թե ինչպես է կասկածյալը սկզբից ճղում խմբի պաստառը, հետո մեքենայից բերված փայտե մահակը թափ տալիս ցուցարարների ուղղությամբ: Երբ ցուցարարները փորձել են կանխել նրա գործողությունները, հանկարծ գրպանից հանել է դանակն ու հարվածներ հարցրել: Վնասվածք են ստացել 18 - 26 տարեկան երեք տղամարդ, մեկը ձեռքի շրջանում, մյուսը՝ ուսի, երրորդի մատն է կտրվել: Ֆրեզնոյի ոստիկանությանը հաջողվել է ձերբակալել կասկածյալին, որը մեղադրվում է մահացու զենքով հարձակման համար: Ցուցարարները շոկի են ենթարկվել, բայց ասել են, որ շարունակելու են իրենց խաղաղ ակցիաները՝ ամերիկացիների ուշադրությունը հրավիրելու Հարավային Կովկասում տեղի ունեցողին իրադարձություններին:
