Ռուսաստանի Դաշնությունը ցավում և ափսոսում է, որ Հայաստանի իշխանությունները շարունակում են թույլ տալ ՀԱՊԿ-ի հասցեին «անհարկի» և հրապարակային քննադատություն:
Այս մասին հերթական ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Ափսոսում ենք, որ Հայաստանի իշխանությունները շարունակում են ՀԱՊԿ-ի հասցեին հրապարակային քննադատություն թույլ տալ:
Ընդ որում՝ ոչ միայն քննադատել, այլ դա անել անհիմն, չնայած այն բանին, որ կազմակերպության քարտուղարության ղեկավարությունը հրապարակավ հաստատել է բոլոր պարտավորությունների պահպանումը հանրապետության նկատմամբ՝ ՀԱՊԿ կանոնադրական նպատակներին և սկզբունքներին լիովին համապատասխան»,- ասել է դիվանագետը՝ մեկնաբանելով ՀՀ վարչապետ Նիկոլ Փաշինյանի հայտարարություններն այն մասին, որ ՀԱՊԿ-ը չի արձագանքել 2021-2022 թվականներին Հայաստանի սահմանի ենթադրյալ խախտմանը։
Հիշեցնենք՝ պատասխանելով The Telegraph և The Critic լրատվամիջոցների հարցերին՝ ՀՀ վարչապետը օրերս նշել էր, որ երբ ՀՀ սահմանները խախտվել են, ՀԱՊԿ մեխանիզմները չեն գործարկվել պատճառաբանությամբ, թե դրանք դելիմիտացված չեն:
