Ազգային ժողովը առաջին ընթերցմամբ ընդունեց «Հայաստանի Հանրապետության հարկային օրենսգրքում փոփոխություն կատարելու մասին» օրենքի նախագիծը՝ 98 կողմ ձայնով։

Օրենքի այս նախագիծը շրջանառության մեջ է դրվել Կառավարության առաջարկով եւ հատուկ ընթացակարգով։ Սա ենթադրում է, որ օրենքի նախագծի երկրորդ ընթերցումը պետք է լինի առաջին ընթերցումից հետո՝ 24 ժամվա ընթացքում։ 

Ինչպես ներկայացրեց Ֆինանսների նախարարի տեղակալ Արման Պողոսյանը, օրենքի այս նախագիծը հնարավորություն կընձեռի 2020 թվականի օգոստոսի 31-ի դրությամբ անհուսալի կամ 91 եւ ավելի օր չսպասարկված վարկերի գծով ներել հաշվարկված տույժերը եւ տուգանքները՝ առանց հարկային հետեւանքների։

Նախագծի հրատապությունը պայմանավորված է ստեղծված իրավիճակով, երբ շատ վարկառուներ կորցրել են իրենց կայուն եկամտի աղբյուրը։ «Ակնկալվում է, որ այս նախագծի ընդունումը, նաեւ՝ վարկերի եւ վարկային կազմակերպությունների նախաձեռնողական վարքագիծը, հնարավորություն կընձեռեն էականորեն բարելավել այս իրավիճակը»,- նշեց Պողոսյանը։

Տնտեսական հարցերի մշտական հանձնաժողովի նախագահ, «Իմ քայլը» խմբակցության պատգամավոր Բաբկեն Թունյանն ընդգծեց օրենքի կարեւորությունն ու պահանջվածությունը։

Նա մանրամասնեց, որ եթե բանկն ընդառաջ է գնում իր վարկառուներին, որոնք ունեն ժամկետանց կամ անհուսալի պարտքեր, միեւնույն է, դրանք բանկի համար համարվում են եկամուտ, հարկման բազա, եւ դրա համար վճարվում է շահութահարկ։

Օրենքի այս նախագծով հնարավորություն է ընձեռվում, որ բանկերն այդ հարկերը չվճարեն, այսինքն՝ ստացվում է, որ այսօր դժվար իրավիճակում հայտնված մեր համաքաղաքացիներին օգնելու նպատակով, եթե բանկերը առաջ քայլ են անում, պետությունը նույնպես իր կողմից քայլ է անում՝ հարկերից նրան ազատելով։ Միեւնույն ժամանակ Թունյանը նաեւ ընդգծեց, որ վերջին հաշվով բանկերն են որոշելու՝ ում տույժ-տուգանքը ներեն, ումը՝ ոչ, սակայն պետությունը նրանց տալիս է բարենպաստ պայմաններ։

Նա նաեւ հայտնեց, որ վաղը առավոտյան տեղի է ունենալու Հանձնաժողովի նիստը, որտեղ ավելի մանրամասն կքննարկեն առաջարկները, ուստի մինչեւ երկրորդ ընթերցում օրենքի այս նախագիծը կլինի լրամշակված տարբերակով։