Հայփոստը սկսում է զարգացման նոր ընդգրկուն ծրագիր սահմանամերձ գյուղերում: Օգոստոսի 12-ին Բարեկամավանում կայացավ ընկերության կոնցեպտուալ նոր տիպի բաժանմունքի բացումն ու գործարկումը: Արարողությանը ներկա էին ՀՀ բարձր տեխնոլոգիական արդյունաբերության նախարարի տեղակալ Ստեփան Ծատուրյանը, Տավուշի Մարզպետ Հայկ Չոբանյանը, Հայփոստ ընկերության գլխավոր տնօրեն Հայկ Կարապետյանը:
Գյուղում ինչպես քաղզում կարգախոսի ներքո մեկնարկած զարգացման նոր ընդգրկուն ծրագրի շրջանակներում նախատեսվում է սահմանային համայնքներում փոստային ենթակառուցվածքների արդիականացման միջոցով հասանելի դարձնել պետական, ֆինանսական, բանկային մի շարք ծառայություններ, ինչպես նաև՝ օպտիկական մանրաթելի միջոցով ապահովել գերարագ ինտերնետի հասանելիություն: Ծրագրի մեկնարկը տրվեց Բարեկամավան գյուղում, քանի որ վերջինս պարբերաբար գնդկոծվում է ադրբեջանական դիքերից և Տավուշի մարզի առավել տուժաց համայնքներից է:
Գյուղի նախկին փոստային շենքը բարվոք վիճակում չէ և գնդակոծման մշտական վտանգի տակ է: Նոր շենքը կառուցվել է փոստի հին շենքի հարևանությամբ, բայց առավել պաշտպանված տեղում: Բաժանմունքը հագեցած է ժամանակակից տեխնոլոգիաներով և ապահովում է Հայփոստի կողմից մատուցվող ծառայությունների ամբողջ սպեկտրը:
Ինչպես ասաց Հայփոստ ընկերության գլխավոր տնօրեն Հայկ Կարապետյանը, նախատեսվում սահմանային գյուղերի փոստային բաժանմունքներում ներդնել ժամանակակից տեխնոլոգիաների մի ամբողջ համակարգ: Տավուշի սահմանամերձ հատվածում ընդգծված ներկայությունն ու արդիակաացումը, զուտ փոստային կապի զարգացման գործոնից բացի ունի նաև լուրջ հոգեբանական, սոցիալական և բարոյական ազդեցություն:
Նշենք, որ բաժանմունքների նոր մոդելը կկիրառվի Հայաստանի այն բնակավայրերում, որտեղ Հայփոստը չունի տարածք կամ որտեղ հին շենքը հնարավոր չէ վերանորոգել: Նոր կոնցեպտի կառույցները պատրաստվելու են թեթև կոնստրուկցիաներով՝ մետաղ, ապակի և ջերմամեկուսիչ նյութեր:
Լուսանկարները՝ Անդրանիկ Ավետիսյանի