Արծրուն Հովհաննիսյանը սեփական դիմումի համաձայն զորացրվել է ՀՀ պաշտպանության նախարարությունում ծառայությունից: Հովհաննիսյանը պաշտպանության նախարարությունում զբաղեցնում էր կադրային և ռազմակրթական քաղաքականության գլխավոր վարչության կրթության վարչության պետի պաշտոնը` 1lurer.am-ը տեղեկացավ ՀՀ ՊՆ-ից:
«Արծրուն Հովհաննիսյանը զորացրվել է սեփական դիմումի համաձայն»,- ասացին ՊՆ-ից:
«Հայկական ժամանակը» ՊՆ-ից դուրս գալու և հետագա անելիքների մասին խոսել է Արծրուն Հովհաննիսյանի հետ:
- Պարոն Հովհաննիսյան, ո՞րն է աշխատանքից ազատվելու պատճառը: Ճի՞շտ են մամուլի այն տեղեկությունները, ըստ որի՝ զորացրման պատճառը պաշտպանության նախարար Վաղարշակ Հարությունյանի հետ ունեցած անհամաձայնություններ են:
- Ես որևէ մեկի հետ, որևէ խնդիր չունեմ: Բանակն իմ տունն ու ընտանիքն է, որին իմ կյանքից քառորդ դար եմ նվիրել: Սա իմ անձնական որոշումն է, որի համար տարբեր պատճառներ ունեմ:
- Որո՞նք են այդ պատճառները, կարո՞ղ եք մանրամասնել:
- Պատճառները, եկեք չնշեմ:
- Ի՞նչ գործունեություն եք պատրաստվում ծավալել: Դասախոսական աշխատանքը շարունակելո՞ւ եք: Հնարավո՞ր է այլ պաշտոնում Ձեզ տեսնենք:
- Զբաղվելու եմ իմ սիրած գործով՝ կրթություն, գիտություն, և անվտանգությանը մոտիկ հասարակական մասնավոր գործունեությունով, ոչ ավելին: Դասախոսական աշխատանքը շարունակելու եմ:
- Ճի՞՞շտ են այն տեղեկությունները, որ պատրաստվում եք արտագաղթել, լքել երկիրը:
- Արտագաղթելու միտք չունեմ: Մշտական ապրելու եմ իմ երկրում: Հնարավոր է՝ տարբեր փուլերում գնամ-գամ ինչ-որ հարցերով, բայց ես ապրելու եմ իմ երկրում:
Նշենք, որ 2012-2020 թվականներին Հովհաննիսյանը եղել է պաշտպանության նախարարության մամուլի խոսնակը: 2020 թվականի սեպտեմբերի 27-ին Ադրբեջանի կողմից սանձազերված պատերազմի ժամանակ ղեկավարել է «Հայկական միասնական հարթակ» կենտրոնի մամուլի ասուլիսները:
