Ռոբերտ Քոչարյանի և Արմեն Գևորգյանի գործով դատական նիստն այսօր հետաձգվեց: Պատճառը Գևորգյանի պաշտպան Լուսինե Սահակյանի բացակայությունն էր:
Դիմումի մեջ Սահակյանը հայտնել էր, որ դեռևս շարունակում է ծանոթանալ քրեական գործի բազմահատոր նյութերին։ Պաշտպանը նաև հիշեցրել է, որ նրան դեռևս չեն տրամադրվել դատավարության ընթացում կազմված նյութերը:
Դատախազ Գևորգ Բաղդասարյանը կարծիք հայտնեց, որ Լուսինե Սահակյանի բացակայության պատճառներն անհարգելի են, և նման վարքագծով պաշտպանը նպատակ ունի անհնարին դարձնել սույն գործով դատավարությունը։ Դատախազը միջնորդեց դատական սանկցիա կիրառել պաշտպանի նկատմամբ հենց իր բացակայության պայմաններում։
«Լուսինե Սահակյանը նախորդ դատական նիստին իր դրսևորած վարքագծով և դատական նիստերին հետագայում ներկայանալու մասին արած իր հայտարարությամբ, ըստ էության, փարատել է դատարանի կասկածները՝ նրա չներկայանալու պատճառների հետ կապված։ Լուսինե Սահակյանը սույն գործով դատական քննությանը ներգրավվել է դատական քննությունն անհնարին դարձնելու նպատակով։ Սա շատ ակնհայտ է, և դա անում է ցանկացած եղանակով՝ դատարանում կանգնելով և չնստելով, ձեր օրինական կարգադրություններին չենթարկվելով, դատական նիստերի դահլիճը լքելով, ապօրինաբար, դատական նիստերին չներկայանալով՝ առանց ձեզ տեղեկացնելով»,- ասաց Գևորգ Բաղդասարյանը։
Դատավոր Աննա Դանիբեկյանն էլ արձանագրեց, որ արդեն երկրորդ դատական նիստն է հետաձգվում Լուսինե Սահակյանի պատճառով, հետևաբար հաջորդ դատական նիստին վերջինիս չներկայանալու դեպքում դատարանը պետք է քննարկի այլ պաշտպան ներգրավելու հարցը։
Հաջորդ նիստը տեղի կունենա հոկտեմբերի 26-ին՝ ժամը 13:00-ին: