Երևանի քաղաքապետարանի մուտքի մոտ այս պահին մեծաթիվ ոստիկանական ուժեր են կուտակվել։ Բանն այն է, որ Երևանի ավագանին այսօրվա նիստում քննարկելու է տրանսպորտի սակագնի բարձրացմանը վերաբերող աղմկահարույց նախագիծը։
Ավելի վաղ ակտիվիստ Արթուր Չախոյանը հայտնել էր, որ ժամը 09։00-ից բողոքի ակցիա են իրականացնելու՝ հայտնելու իրենց անհամաձայնությունը նախագծին, և կոչ էր արել քաղաքացիներին միանալ իրենց։
Նշենք, որ ըստ նախագծի՝ առաջարկվում է տարեկան կտրվածքով երթևեկության համար տրանսպորտի ուղեվարձը դարձնել փաթեթային համակարգով 90,000 դրամ՝ քարտային տարբերակով, իսկ եթե ձեռք է բերվում էլեկտրոնային կրիչ, ապա՝ 88,000 դրամ:
1 ամսվա համար տրանսպորտի ուղեվարձի փաթեթը կդառնա 9000 դրամ, 1 օրվա համար 8 անգամ երթևեկելը կարժենա 900 դրամ, իսկ 7 օրվա համար առավելագույնը 30 անգամ տրանսպորտով երթևեկելը՝ 5000 դրամ։
90 րոպե երթևեկելը կարժենա 300 դրամ, իսկ 30 օրում 10 ուղևորության համար քաղաքացիները կվճարեն 2200 դրամ: