Ձեր ուշադրությանն ենք ներկայացնում այսօրվա ուշագրավ և կարևոր իրադարձությունների ամփոփ լրահոսը մեկ հոդվածով․

Այսօր հզոր պայթյուն է որոտացել Բեյրութի նավահանգստում։ Ուժգին պայթյունը վնասել է նավահանգստից կիլոմետրերով հեռու շենքերն ու բնակարանները։ Նավահանգստին մոտ է հայաբնակ Բուրջ Համուդ թաղամասը, որտեղ եւս մեծ ավերածություններ են եղել։ Անջատվել է էլեկտրականությունը։ Վնասվել են նաեւ հայկական հաստատությունները։

• ՀՀ Վարչապետ Նիկոլ Փաշինյանը իր ցավակցությունն է հայտնել և գրառումներ է արել Թվիթերի և Ֆեյսբուքի իր էջերում։
• Բեյրութում տեղի ունեցած հզոր պայթյունի հետևանքով վնասվել է Լիբանանում Ռուսաստանի դեսպանատան շենքը, վիրավորվել է դիվանագիտական ​​առաքելության աշխատակից. Այս մասին հայտնել է Ռուսաստանի Զինված ուժերի «Զվեզդա» հեռուստառադիոընկերությունը
• Բեյրութում տեղի ունեցած պայթյունի հետևանքով վնասվել է Ղազախստանի դիվանագիտական ​​առաքելության շենքը, հյուպատոսը ստացել է փոքր վնասվածքներ։ Պայթյունի ալիքի ազդեցության հետևանքով վնաս է հասցվել Լիբանանում Ղազախստանի դիվանագիտական ​​ներկայացուցչության տարածքին: 
• Հայահոծ թաղամասերում, ինչպես ողջ Բեյրութում, ավերածությունները զգալի են։ Պայթյունից մասնակիորեն վնասվել է նաև Լիբանանում ՀՀ դեսպանության շենքը:
• Արամ Ա-ն Բուրջ Համուդի քաղաքապետ Մարտիկ Պողոսյանի եւ ՀՅԴ Բյուրոյի անդամ Հակոբ Խաչերյանի ուղեկցությամբ ծանոթացել է պայթյունից հետո հայաբնակ թաղամասերի վիճակին
• Պայթյունի հետևանքով զոհվել է Լիբանանի Քաթայիբ կուսակցության գլխավոր քարտուղար Նիզար Նաջարյանը:
• Բեյրութի նահանգապետը կատարվածը համեմատել է «Հիրոսիմա և Նագասակի ռմբակոծությունների հետ», իսկ Լիբանանի գաղտնի ծառայության ղեկավարը վաղաժամ է համարում ահաբեկչական հարձակման մասին խոսելը: Լիբանանի նախագահ Միշել Աունը գումարելու է երկրի Գերագույն պաշտպանության խորհրդի նիստ: Նա կարգադրել է բժշկական օգնություն ցուցաբերել բոլոր տուժածներին Առողջապահության նախարարության միջոցների հաշվին, ինչպես նաև ժամանակավոր կացարան տրամադրել բոլոր այն քաղաքացիներին, որոնց տներն ու գույքը վնասվել են: Լիբանանի Վարչապետը օգոստոսի 5-ը հայտարարել է ազգային սուգի օր: 
• Ըստ վերջին պաշտոնական տվյալների՝ Լիբանանի առողջապահության նախարարությունը տեղեկացնում է, որ Բեյրութի նավահանգստում տեղի ունեցած պայթյունի հետևանքով 40 զոհ է գրանցվել, վիրավորվել է մոտ 2,5 հազար մարդ, զոհերի թիվը կարող է դեռ աճել: 

Օրվա ուշագրավ և կարևոր իրադարձությունների ամփոփ լրահոսը մեկ հոդվածով կազմեց Անդրանիկ Ավետիսյանը