ՀՀ ՆԳՆ Ոստիկանության Երևան քաղաքի Նոր Նորք վարչական շրջանի բաժին 3 անձի ներխուժման, սպառնալիքներ հնչեցնելու և պայթյուն կատարելու դեպքի առթիվ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնվել է քրեական վարույթ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։ Այդ մասին Ֆեյսբուքում գրել ք ՔԿ մախագահի մամուլի քարտուղար Գոռ Աբրահամյանը։
«Ներխուժած անձանցից երկուսը Ոստիկանության բաժնում տեղի ունեցած պայթյունի հետևանքով ստացած բեկորային վնասվածքներով տեղափոխվել են բուժհաստատություն։ Մյուսը ԱԱԾ ծառայողների կողմից վնասազերծվել է։ Վերջինս ձերբակալվել է վերոնշյալ հանցանքն առերևույթ կատարելու մեջ անմիջականորեն ծագած հիմնավոր կասկածի հիմքով։
Այս պահին կատարվում են անհետաձգելի քննչական և վարութային, ինչպես նաև օպերատիվ-հետախուզական միջոցառումներ դեպքի հանգամանքները պարզելու ուղղությամբ։ Հետագայում ՀՀ քննչական կոմիտեն հանրությանը թույլատրելիության սահմաններում կտեղեկացնի քննության արդյունքների մասին»,- նշել է Աբրահամյանը։
Ըստ որոշ տեղեկությունների, այսօր նռնակով զինված քաղաքացին, որ Նոր նորքի բաժանմունքի մոտ ահաբեկչություն էր իրականացնում, Կոտայքի մարզի Զառ գյուղից է, անունը՝ Ս. Հովակիմյան: Նա իրավապահներին հայտնել է, թե ինքը «Սասնա ծռերից է» և իր պահանջները արդար են եղել: Նշենք, որ նա ոստիկանության շենքի վրա հարձակումից առաջ Ֆեյսբուքումտեսանյութ էր հրապարակել: Նշենք, որ Կոտայքի մարզի Զառ գյուղի վարչական ղեկավարը նույնպես նշեց, որ այդ անձնավորությունը «Սասնա ծռեր»-ից է:
Նրա ֆեյսբուքյան էջում նշված է, որ ապրում է Աբովյանում, իսկ ֆեյսբուքյան լրահոսից ակնհայտ է, որ առնվազն համակրում է Ազգային Ժողովրդական Բևեռին։ ԱԺԲ Խորհրդի անդամ Վահե Գասպարյանը նշել է, որ երեքն էլ պատերազմի մասնակիցներ են և «Ազգային ժողովրդավարական բևեռի» համակիր։ «Արթուր Մովսիսյանը որդեկորույս հայր է, ում զավակը զոհվել է 44-օրյա պատերազմի ժամանակ, իսկ մյուսները՝ Վարդգեսը և Ստեփանը, ևս պատերազմի մասնակից են եղել»,- ասել է Գասպարյանը։
