Հայաստանի Հանրապետության նախագահ Վահագն Խաչատուրյանը կարևորում է շուկայական տնտեսության բոլոր բնագավառներում մենաշնորհների վերացումը․ նրա գնահատմամբ՝ քայլեր արդեն իսկ արվել են էներգետիկայի ոլորտում: Նախագահը նման դիրքորոշում հայտնեց «Հայաստանի էներգետիկայի բնագավառի ներկան և ապագան» խորագրով համաժողովի իր ելույթում:
«Ցանկացած երկրի համար էներգետիկ անվտանգությունը զարգացման առումով առանձնահատուկ նշանակություն ու դեր ունի: Մեզ համար էլ միշտ այդպես է եղել: Անկախացումից հետո բոլորիս հետաքրքրությունների կիզակետում են եղել էներգետիկայում տեղի ունեցող իրադարձությունները՝ սկսած 90-ականներից, երբ մենք լրջագույն շրջափակման պայմաններում ունեինք էներգետիկ ճգնաժամ և դրանից հետո, երբ մենք իրականում էլեկտրաէներգիայի պակաս չունեինք, բայց կարիք ունեինք կառավարման փոփոխությունների: Եվ մարդիկ, որոնք երկար ժամանակ են աշխատում համակարգում, կարող են թվարկել, թե ինչպիսի բարեփոխումներ են տեղի ունեցել այդ համակարգում և դրանք որքանով են արդյունավետ եղել»,-ասաց նախագահը:
Նախագահը նկատեց՝ զարգացման հիմնական խոչընդոտներից մեկը եղել է մենաշնորհային դիրքը: Նույն խնդիրը կա գազի համակարգում:
Նա հավելեց՝ շուկայական տնտեսության մեջ ցանկացած բնագավառում, որտեղ կա մենաշնորհ, մեկ մատակարար, զարգացում չի կարող լինել: Խաչատուրյանը նկատեց, որ այդ առումով այդ բնագավառում լրջագույն աշխատանք է կատարվել Հայաստանում՝ հատկապես օրենսդրական բարեփոխումների մակարդակում:
«Էլեկտրաէներգիայի մատակարման առումով չունեինք ազատ շուկա: Երբ առաջին անգամ լսեցի, որ այդպիսի քայլ են ուզում անել, մտքումս անհանգստանում էի՝ արդյոք մենք չենք տապալի՞ այդ աշխատանքը: Փետրվարի 1-ից այս համակարգը սկսեց աշխատել, արդեն արդյունքներն են ամփոփվում: Եվ, որքանով ես եմ ծանոթ, կարող եմ ասել, որ իսկապես այդ համաձակ նախաձեռնությունն իր արդյունքներն արդեն տալիս է»,-ասաց նախագահը՝ նկատելով, որ մենաշնորհից հեշտ չեն ազատվում:
Ըստ նախագահի՝ նախկին մենաշնորհ ունեցողի կողմից կա դիմադրություն: Նա հավելեց՝ պետք է կարողանալ կարգավորող մարմինների միջոցով «այդ ախորժակը» նվազեցնել:
«Մեր էներգետիկ բալանսում կտրուկ փոփոխություններ են տեղի ունենում: Այդ փոփոխություններն ավելի մեծանալու են: Կառավարությունն իր առջև լրջագույն խնդիր է դրել՝ այլընտրանքային էներգետիկայի տեսակարար կշիռն ավելացնելու առումով»,-ասաց Խաչատուրյանը:
Նախագահն ընդգծեց՝ տնտեսական զարգացման առաջընթացը միայն տնտեսական գործունեության ազատության մեջ է: «Մենք գոնե մինչև վերջին ժամանակներս շատ լավ գիտեինք, թե ինչ է նշանակում ունենալ մենաշնորհային «կարգավորված տնտեսություն»,-ասաց Խաչատուրյանը՝ հետևողականության համար շնորհակալություն հայտնելով ԱՄՆ միջազգային զարգացման գործակալությանը:
Նախագահի խոսքով՝ մինչև 2025 թվականը դեռ ևս երկու օրենք պետք ընդունվի՝ ի նպաստ էներգետիկայի ոլորտի զարգացման:
