Մարսելի Բոմոն շրջանում մարտի 15-ին տեղի կունենա հայ վրիժառու Սողոմոն Թեհլերյանի կիսանդրու հանդիսավոր բացումը:
1921 թվականի մարտի 15-ին Բեռլինում հայ հեղափոխական Սողոմոն Թեհլերյանը սպանեց Թալեաթ փաշային՝ Հայոց ցեղասպանության կազմակերպիչներից մեկին։ Թեհլերյանի գործողությունները մաս էին կազմում «Նեմեսիս» օպերացիայի, որը փորձում էր պատասխանատվության ենթարկել Հայոց ցեղասպանության մեղավորներին:
Սպանությունից հետո Թեհլերյանին դատել են Գերմանիայի դատարանում, այնուհետև նա անմեղ է ճանաչվել ու ազատ արձակվել։
Արդարացված Թեհլերյանը երկար տարիներ ապրել է Հարավսլավիայի մայրաքաղաք Բելգրադի Դալմատինսկա փողոցի թիվ 78 տանը։
1945 թվականից հետո բնակություն է հաստատել նախ Կազաբլանկայում (Մարոկկո) և ապա ԱՄՆ-ի Սան Ֆրանցիսկո քաղաքում, որտեղ էլ մահացել է 1960 թվականի մայիսի 23-ին։ Թաղվել է Ֆրեզնոյի հայկական «Արարատ» գերեզմանոցում։
Ի հիշատակ Թեհլերյանի՝ հուշարձան է կանգնեցվել Ֆրեզնոյի իր գերեզմանին, Թալինի շրջանի Մաստարա գյուղում և Երևանում: