«Միջազգային հանրապետական ինստիտուտի»-ը հրապարակել է 2023 թվականի դեկտեմբերին անցկացված հարցման արդյունքները, որի շրջանակներում մասնակիցները պատասխանել են, թե որ կուսակցությանը կամ դաշինքին կտային իրենց ձայնը, եթե խորհրդարանական ընտրություններն անցկացվեին հաջորդ կիրակի:

Ինչպես նշված է հրապարակման մեջ, ըստ  հարցման սպոնտան պատասխանների՝ մասնակիցների  17 տոկոսը նշել է, որ իր ձայնը կտա Քաղաքացիական պայմանագիր կուսակցությանը, 3 տոկոսը՝ Նիկոլ Փաշինյանի կուսակցությանը կամ իշխող կուսակցությանը, 3-ական տոկոսը՝ «Իմ Քայլը» դաշինքին ու «Հայաստան» դաշինքին, 2-ական տոկոսը՝ Հայաստանի Հանրապետական,  «Հանրային ձայն», «Բարգավաճ Հայաստան», Գագիկ Ծառուկյանի կուսակցությանը, 1-ական տոկոսը՝ «Հանրապետություն», Արամ Սարգսյանի կուսակցություն, Հայ Ազգային Կոնգրես, Հայ Հեղափոխական Դաշնակցություն, Ռոբերտ Քոչարյանի, Վարդան Ղուկասյանի կուսակցություններին: Այլ կուսակցություններին և դաշիքներին իրենց ձայնը կտային հարցվածների 4 տոկոսը, ոչ մեկին չէր քվեարկի 10 տոկոսը, քվեաթերթիկը կփչացներ 6 տոկոսը, իսկ քվեարկությանը չէր մասնակցի 26 տոկոսը:

Հետազոտությունն իրականացվել է Միջազգային հանրապետական ինստիտուտի Հարցումների հետազոտության կենտրոնի նախաձեռնությամբ:Տվյալները հավաքվել են 2023 թվականի դեկտեմբերի 13-22-ն ընկած ժամանակահատվածում հեռախոսային հարցման մեթոդով։  Ընտրանքը կազմված է եղել 18 տարին լրացած 1508 ՀՀ քաղաքացիներից։ Այն քաղաքացիները, ովքեր ապրել են Հայաստանում ավելի քիչ, քան 6 ամիս, չեն ներառվել ընտրանքում։