Հարց․ Պարոն վարչապետ, վերլուծական-քաղաքական շրջանակներում անընդհատ քննարկվում է, թե արդյո՞ք Ռուսաստանի դիրքերը տարածաշրջանում թուլացել են։ Պնդում են անգամ, որ Ռուսաստանը հեռանում է տարածաշրջանից։ Դրան ի հակառակ՝ Լավրովն ասում է, որ այս տարածաշրջանում Ռուսաստանը կենսական շահեր ունի։ Դուք, գործի բերումով նաև, թերևս ամենատեղակացվածն եք տարածաշրջանի հարցում Ռուսաստանի տրամադրվածությունից։ Արդյո՞ք Ձեր տպավորությունն էլ է այդպես, որ Ռուսաստանը հեռանում է, և տարածաշրջանում վակուում է առաջանում։ Մենք Ռուսաստանի հեռանալու մարտահրավեր ունե՞նք մեր օրակարգում` որպես պետություն, թե՞ արհեստական օրակարգի հետ գործ ունենք։
Պատասխան․ Ես ժամանակին ինքս էլ նման միտք արտահայտել եմ ՀԱՊԿ հետ կապված․ նկարագրեցի ՀԱՊԿ-ի, մեր գնահատմամբ, անգործությունը 2021-22թթ․ իրադարձություններին։ Դա կողքից ի՞նչ տպավորություն կարող է թողնել վերլուծաբանների մոտ, պարզ է, որ այդ եզրակացությանը պետք է գալ։ Իհարկե, հայտարարությունների մասով ՌԴ-ն ասում է, որ չեն պատրաստվում այս տարածաշրջանից հեռանալ, բայց Դուք հարցնում եք նաև՝ ինչ գիտեք տրամադրությունների մասին։ ՌԴ-ն մեզ ասել է, որ Հայաստանի ինքնիշխան տարածքն ու դե յուրե սահմանները իրենց համար կարմիր գիծ են։ Եկեք համեմատենք այդ երկու հայտարարությունները։ Վերլուծություն անողը կարո՞ղ է գալ այդ եզրակացության։
Ըստ վարչապետի՝ ՌԴ-ն հայտարարել է, որ Հայաստանի ինքնիշխան տարածքը կարմիր գիծ է, բայց դա գործնականում չի իրացվել, հետևաբար, կարելի է մտածել, որ նշված հայտարարությունն ընդամենը հայտարարություն է, և խոսք չկա, որ այն իրացվելու է։ Նրա խոսքով՝ 20-րդ դարասկզբին հայ ժողովուրդն առերեսվել է նման իրավիճակի հետ. «Ինչ են եղել դրա հետևանքները, բոլորս գիտենք։ Եվ կարմիր գծի հետ կապված իրադրությունը մեզ համար կարմիր տագնապի լույս է, որ այստեղ ինչ–որ բան այն չէ»։
