Կապան համայնքը վերածվել է ակտիվ շինհրապարակի, համայնքի բյուջեի միջոցներով մի քանի ուղղություններով ընթանում են հիմնանորոգման և բարեկարգման աշխատանքներ։ Այս մասին հայտնում են Կապանի համայնքապետարանից:
Համայնքի ղեկավար Գևորգ Փարսյանը ամենօրյա և անմիջական հսկողության տակ է պահում կատարվող աշխատանքների ընթացքը և վերահսկում դրանց որակյալ կատարման ապահովումը:
Փողոցների պատշաճ մակարդակը պահպանելու և վարորդներին հնարավոր անհարմարություններից ձերբազատելու նպատակով քաղաքի կենտրոնական և երկրորդական փողոցներում իրականացվել են ասֆալտբետոնե ծածկի փոսային նորոգման աշխատանքներ։ Նշյալ շինաշխատանքներն ընդգրկել են համայնքի՝ առավել անմխիթար վիճակում գտնվող Երկաթուղայինների, Շահումյան (կայարանամերձ և աջափնյակ հատված), Մ․Ստեփանյան, Գ․Նժդեհ, Հ. Թումանյան, Ա․Մանուկյան, Գր․Արզումանյան, Ռ․Մինասյան, Լեռնագործների փողոցները, Դավիթ Բեկ թաղամասը և դեպի Հալիձոր թաղամասի կամուրջը տանող ճանապարհահատվածը։ Շինարարական աշխատանքների պայմանագրային արժեքը կազմում է 7 906 860 ՀՀ դրամ: Շինարարական կազմակերպությունն է «ԿԱՊԱՆԻ ՃՇՇ» ՍՊԸ-ն:
Ասֆալտապատման և սալիկապատման աշխատանքներ են իրականացվում Մ. Ստեփանյան, 20 և Գ․Նժդեհ, 12 շենքերի բակային տարածքներում։ Շինարարական աշխատանքների պայմանագրային արժեքն է 11 792 868 ՀՀ դրամ, շինարարական կազմակերպությունը՝ «ԿԱՊԱՆԻ ՃՇՇ» ՍՊԸ-ն:
Համայնքապետարանից հայտնում են, որ երկրորդ շնչառություն է ստանում նաև Մ․Պապյան, 18 շենքի բակային հատվածը, որտեղ նախատեսվում է իրականացնել սալիկապատման, նստարանների տեղադրման, խաղահրապարակի կառուցման, ինչպես նաև ծառատնկման աշխատանքներ։ Շինարարական աշխատանքների պայմանագրային արժեքն է 13 534 066 ՀՀ դրամ: Շինարարական կազմակերպությունն է «ԿԱՈԼԻՆ» ՍՊԸ-ն:
Բարեկարգման հաջորդ հասցեն Ա․Մանուկյան, Ստ. Շահումյան, Հ․Ավետիսյան, Ս. Սպանդարյան փողոցների հատման կամրջի (կենտրոնական) մայթերն են։ Այստեղ ևս նախատեսվում է սալիկապատման, եզրաքարերի, բազրիքների և լուսատուների՝ նորերով փոխարինման աշխատանքներ։ Շինարարական աշխատանքների պայմանագրային արժեքն է 24 800 000 ՀՀ դրամ, շինարարական կազմակերպությունը՝ «ԿԱՊԱՆԻ ՆՈՐՈԳՇԻՆ» ՍՊԸ-ն:
Ա․Մանուկյան փ. 1-ին նրբանցքի թիվ 1/2 հասցեում նախատեսվում է հիմնել նոր մարտարվեստի դպրոց, որի շինարարական աշխատանքները կմեկնարկեն մոտակա ժամանակներում։ Շինարարական աշխատանքների պայմանագրային արժեքը կազմում է 31 703 970 ՀՀ դրամ, շինարարական կազմակերպությունն է «ԼԻԱՇԻՆ» ՍՊԸ-ն:
Բարեկարգման մյուս հասցեն Վահանավանքի թաղամասն է, որտեղ վանքի հարևանությամբ կկառուցվի 4 տաղավար, ինչն էլ իր հերթին կբարելավի բնակչության ազատ ժամանցի և հանգստի կազմակերպման որակը։ Շինարարական աշխատանքների պայմանագրային արժեքը մոտ 21 000 000 ՀՀ դրամ է: Շինարարական կազմակերպությունն է «ԱՐՇ-ԱՐԱ» ՍՊԸ:
Մոտակա ժամանակներում իրականացվող աշխատանքներից են նաև Մ․Ստեփանյան փողոցի թիվ 8 շենքի տանիքի նորոգման և Ստ. Շահումյան փողոցի թիվ 2 շենքի հարևանությամբ տեղադրվող կանգառի աշխատանքները։ Շինարարական աշխատանքների պայմանագրային արժեքն է 6 306 000 ՀՀ դրամ, շինարարական կազմակերպությունը՝ «ԲԻԼԴԵՐՍ» ՍՊԸ-ն:
