Հայաստանի իշխանությունները մտադիր են իրականացնել ծրագիր, որն ուղղված է բնակարանով ապահովելու Լեռնային Ղարաբաղից բռնի տեղահանված այն անձանց, որոնք ստացել են Հայաստանի Հանրապետության քաղաքացիություն: Այս մասին, այսօր՝ փետրվարի 28-ին Ազգային ժողովի նիստում կառավարության հետ հարցուպատասխանի ժամանակ հայտարարել է փոխվարչապետ Տիգրան Խաչատրյանը։
Նրա խոսքով, եթե ընտանիքի անդամները որոշեն դառնալ Հայաստանի քաղաքացի, հանրապետության իշխանությունները նրանց օգնություն կտրամադրեն։ Խոսքը կոնկրետ ֆիքսված գումարի մասին է։ Ընդ որում՝ ընտանիքի յուրաքանչյուր անդամի հաշվարկով: Ֆինանսական միջոցները հասանելի կլինեն բնակարան կամ տուն գնելու կամ կառուցելու համար:
«Այդ տանը կամ բնակարանում 10 տարի ապրելուց հետո սեփականությունը կանցնի տվյալ ընտանիքին»,- ասել է Խաչատրյանը։
Նա հիշեցրել է, որ այս փուլում 16 մլն դրամի աջակցության ծրագիր է իրականացվում հանրապետության սահմանամերձ բնակավայրերում ապրող ընտանիքների համար։
Միաժամանակ իշխանությունները նախատեսում են ընդլայնել այս ծրագրում ընդգրկված տարածքների ցանկը՝ ներառելով նաև գյուղական և քաղաքային բնակավայրերը։ «Եվ եթե արցախցիները որոշեն բնակարաններ գնել կամ կառուցել այս բնակավայրերում, ապա ֆինանսական օգնության չափն ավելի մեծ կլինի, քան հիմնականն է»,- վստահեցրել է կառավարության ներկայացուցիչը։
Ինչպես նշել է Խաչատրյանը, տեսականորեն ծրագրի շահառու կարող է դառնալ ավելի քան 25 հազար ընտանիք։ Միաժամանակ դրամական օգնության միջին չափը կարող է հասնել 12-18 մլն դրամի։ «Մեր մոտավոր հաշվարկներով ծրագրին կարող է մասնակցել 110-120 հազար մարդ։ Սա միջինը 3 մլն դրամ մեկ անձի համար հաշվարկով։ Այս դեպքում աջակցության ընդհանուր ծավալը կկազմի մոտ 400 մլրդ դրամ»,- ասաց փոխվարչապետը։
Այսինքն, ինչպես նշեց քաղաքական գործիչը, խոսքը պետբյուջեից հատկացված հսկայական միջոցների մասին է։ Այս առումով Հայաստանի քաղաքացիություն ստանալն ու 10 տարի բնակություն հաստատելը կլինեն ծրագրին մասնակցելու հիմնական պայմանները:
