Լաչինի միջանցքի ապաշրջափակման հարցով Մոսկվան աշխատում է բոլոր կողմերի հետ և ոչ միայն հրապարակային հարթությունում: Այդ մասին ճեպազրույցի ժամանակ ասել է ՌԴ ԱԳՆ պաշտոնական ներկայացուցիչ Մարիա Զախարովան:
«Ինչ վերաբերում է Լեռնային Ղարաբաղ մարդասիրական օգնության մատակարարմանը, ապա առանձին երկրներ և միջազգային կառույցներ տարբեր տարբերակներ են մշակում»,- նշել է Զախարովան, սակայն չի հստակեցրել՝ ինչ տարբերակներ նկատի ունի, և որ կառույցներն են դրանք մշակում։
Լեռնային Ղարաբաղը չի մտնում ՀԱՊԿ պատասխանատվության գոտի, միևնույն ժամանակ, կազմակերպության դիտորդական առաքելության տեղակայումը Հայաստանում նշանակալի ներդրում կունենար հայ-ադրբեջանական սահմանին իրավիճակի կայունացման գործում։ Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ:
«Գնդակը Հայաստանի դաշտում է»,- հավելել է ՌԴ ԱԳՆ խոսնակը։
Զախարովան նաև շատ հավանական է համարել մոտ ապագայում Հայաստանի, Ռուսաստանի և Ադրբեջանի արտգործնախարարների հանդիպման անցկացումը, նշել, որ հանդիպման ամսաթվի հստակեցումից հետո ՌԴ ԱԳՆ-ն կտրամադրի համապատասխան տեղեկությունը։
ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ մեկնաբանել է 2025 թվականին Լեռնային Ղարաբաղից ռուսական խաղաղապահ զորախմբի դուրս գալու մասին Թուրքիայի նախագահ Ռեջեփ Թայիփ Էրդողանի հայտարարությունը:
«Ուզում եմ հիշեցնել, որ Անկարան Ռուսաստանի, Հայաստանի և Ադրբեջանի ղեկավարների՝ 2020 թվականի նոյեմբերի 9-ի հայտարարության կողմ չէ: Հենց այդ փաստաթղթի հիման վրա է Լեռնային Ղարաբաղի հակամարտության գոտում տեղակայվել ռուսասկան խաղաղապահ զորախումբը։ Հենց այդ փաստաթղթում են նշված ինչպես զորախմբի տեղակայման ժամկետները, այնպես էլ դրա՝ ևս հինգ տարով հնարավոր երկարաձգման պայմանները»,- ասել է Զախարովան, հավելել՝ ներկայիս լարվածության պայմաններում խաղաղապահների գործունեության պահանջարկը է՛լ ավելի մեծ է։
ՌԴ ԱԳՆ խոսնակը նշել է, որ Հարավային Կովկասում խաղաղության ապահովումը բխում է ինչպես Հայաստանի և Ադրբեջանի, այդպես էլ տարածաշրջանի մյուս երկրների, այդ թվում՝ Թուրքիայի շահերից։
«Մենք ընդգծում ենք թուրքական կողմի հետ գործակցությունը Աղդամի Ռուս-թուրքական համատեղ կենտրոնի շրջանակում»,- եզրափակել է Զախարովան։