«Եվրոպան տեղայնացվում է» ծրագրի շրջանակներում Հայաստանի որոշ համայնքապետարանների ներկայացուցիչներից կազմված պատվիրակությունն այցելել է Լեհաստան։ Ուսումնական այցերի շրջանակներում նախատեսվում էր համագործակցային կապեր հաստատել հայ և եվրոպացի գործընկերների միջև՝ ինտեգրվելով եվրոպական առաջադեմ փորձին:
«Եվրոպան տեղայնացվում է» երկարաժամկետ ծրագրի ազգային մենթոր Արթուր Նաջարյանն «Արմենպրես»-ի հետ ունեցած զրույցի ժամանակ նշեց, որ ուսումնական այցի նպատակն էր համայնքապետարանների ներկայացուցիչներին զինել համապատասխան գիտելիքներով և փորձով՝ իրենց համայնքներում երիտասարդական աշխատանքի ռազմավարության մշակման, երիտասարդական աշխատանքի ոլորտում շահագրգիռ կողմերի միջև երկխոսության ամրապնդման, ծրագրերի իրականացման և երիտասարդական աշխատանքի եվրոպական փորձի տեղայնացման համար:
Ուսումնական այցի շրջանակներում Լեհաստան մեկնած հայկական պատվիրակության կազմում էին Գավառի, Տաթևի, Վաղարշապատի և Խոյի համայնքապետարանների պատասխանատուներ և ավագանու անդամներ։
««Եվրոպան տեղայնացվում է» երկարաժամկետ ծրագիրը նպատակաուղղված է միջազգային համագործակցության հաստատմանը Եվրոպական միության ու Արևելյան գործընկերության երկրների համայնքապետարանների, տեղական երիտասարդական կազմակերպությունների, անհատ փորձագետների միջև և եվրոպական ընդգրկուն ցանցի ստեղծմանը»,-նշեց Արթուր Նաջարյանը:
Ուսումնական այցին մասնակցում էին Արևելյան գործընկերության 4 երկրների՝ Հայաստանի, Վրաստանի, Մոլդովայի և Ադրբեջանի համայնքապետարանների ներկայացուցիչներ և ավագանու անդամներ։
«Եվրոպան տեղայնացվում է» երկարաժամկետ (2021-2027թթ.) ծրագիրը Հայաստանում համակարգում է «Երիտասարդական նախաձեռնությունների կենտրոն» ՀԿ-ն:
