«Մենք տեսնո՞ւմ ենք Հայաստան-Ադրբեջան հարաբերությունների մեջ Թուրքիային, թե՞ չենք տեսնում, իրականությունն այն է, որ այսպես թե այնպես Թուրքիայի ներկայությունը և՛ տեսնում ենք, և՛ զգում ենք, և՛ դա կա»:
Այս մասին հրավիրված ասուլիսի ժամանակ ասաց վարչապետ Նիկոլ Փաշինյանը՝ արձագանքելով հարցին, թե Արևմուտքի կողմից հայ-ադրբեջանական կարգավորման գործընթացում Թուրքիային ներգրավելու միտում տեսնո՞ւմ է:
«Կարծում եմ, որ Թուրքիայի հետ մեր հարաբերություններում մի կարևոր բան է տեղի ունենում՝ մենք խոսում ենք իրար հետ: Ես համարում եմ, որ Թուրքիայի նախագահի հետ մենք ունենք խոսակցություն և երկխոսություն, և այդ երկխոսությունը շատ բարդ է, բայց կարևոր է, որ այդ խոսակցությունը լինի:
Ես հիշում եմ մեր քննարկումները, ընկալումները և զգացողությունները, երբ ես Պրահայում շփում ունեցա Թուրքիայի նախագահի հետ, այդ լուսանկարը համացանցում էր հայտնվել, հիշում եմ, թե դա ինչ մեծ շփոթ, քննարկում, արձագանք էր առաջացրել՝ դրական, բացասական: Ես հիշում եմ նաև Հայաստանում մեր շատ թիմակիցների լարվածությունը դրանից, իսկ ի՞նչն է տարօրինակ այդտեղ, ընդհակառակը տարօրինակ է, որ երկու երկիր, որ ընդհանուր սահման ունեն, իրեր հետ խոսակցություն չունեն: Կամ հաղորդագրությունը, որ ՀՀ վարչապետը և Թուրքիայի նախագահը հեռախոսազրույց են ունեցել, դա ի՞նչ մի արտառոց իրադարձություն է, մինչդեռ դա պետք է լիներ և պետք է լինի սովորական և առօրյա բան, և ես ուրախ եմ, որ այսօր մեր հատուկ ներկայացուցիչները, ըստ էության, մշտական կապի մեջ են, ԱԳ նախարարների մեջ կա երկխոսություն, և մենք այդ խոսակցության մեջ երբեմն հասկանում ենք, որ առնվազն որոշ դրվագներում մենք իրենց ասածը այդքան ճշգրիտ չենք հասկանում, իրենք մեր ասածը ճշգրիտ չեն հասկանում, և դրա արանքում առաջանում է նեգատիվ էներգիա, բայց որ առանց դրա արդյունք չի լինի, երաշխավորված է»,- ասաց Նիկոլ Փաշինյանը:
Ըստ վարչապետի՝ մենք Թուրքիային ոչ թե ընկալում ենք մի երկիր, որը մեր սահմանից անմիջապես այն կողմ է՝ մեր դիմացի հարևանն է, այլ ընկալում ենք Ադրբեջանի հետ մեր հարաբերությունների միջոցով: Մինչդեռ պետք է Թուրքիայի հետ օրակարգ ունենանք:
«Ես հիշում եմ, որ 2018 թվականից հետո սոցիալական ցանցերում երբ որ ինչ-որ մեկը ուզում էր ինչ-որ բան անել, ինձ ինչ-որ թուրքական սիմվոլներով նկարում էին, բանը հասավ նրան, որ ես ստիպված էի հայտարարել, որ ինձ վիրավորելու համար մի ասեք, օրինակ, թուրք, որովհետև, որ ասում եք գերմանացի, ի՞նչ ես դրանից պիտի վիրավորվեմ: Իմ կարծիքով՝ պետական ճիշտ ընկալումը սա է և պետք է չի ժխտել, որ Թուրքիան միջազգային մեծ դերակատար է, մենք պետք է առերեսվենք այս փաստին»,- նկատեց նա: