Հունվարի 17-ին «Բաց դաս» ծրագրի շրջանակում խորհրդարանը կրկին բացել էր դռները: Օրվա հյուրերն էին Հրազդան քաղաքի Լեւոն Խեչոյանի անվան թիվ 10 ավագ դպրոցի աշակերտներն ու ուսուցիչները:
Հյուրերն ԱԺ նիստերի դահլիճի օթյակից հետեւել են օրենսդրի աշխատանքին, եղել են խորհրդարանի թանգարանում եւ գրադարանում: Նրանց հետ հանդիպել եւ զրուցել են «Քաղաքացիական պայմանագիր» խմբակցության պատգամավորներ Լիլիթ Ստեփանյանը եւ Ալխաս Ղազարյանը:
Պատգամավորներն աշակերտներին ներկայացրել են խորհրդարանի գործունեությունը, օրենքների մշակման գործընթացը՝ ընդգծելով աշխատանքի պատասխանատվության գործոնը:
Հանդիպումն ընթացել է հարցուպատասխանի ձեւաչափով: Մասնավորապես, հյուրերը հետաքրքրվել են կրթության ոլորտի զարգացմանն ուղղված ծրագրերով: Նրանք բարձրաձայնել են նաեւ իրենց դպրոցի բարեկարգման հարցը:
Պատգամավոր Լիլիթ Ստեփանյանն առաջնային է համարել ուսուցիչների աշխատավարձի բարձրացման հարցը՝ գնահատելով նրանց դերը կրթված հասարակություն ունենալու գործում: Ալխաս Ղազարյանն էլ տեղեկացրել է, որ այս տարվանից ավելացել է գիտնականների աշխատավարձը: Նա հույս է հայտնել, որ դա կնպաստի առավել արդյունավետ օգտագործել գիտական ներուժը՝ խթանելով երիտասարդների ներգրավումը գիտության ոլորտում:
Անդրադարձ է կատարվել նաեւ տնտեսության, գյուղատնտեսության եւ այլ ոլորտների զարգացման հարցերին:
Հանդիպումից հետո հյուրերը լուսանկարվել են խորհրդարանի նիստերի դահլիճում:
