Լրագրողների հետ զրույցում Անվտանգության խորհրդի քարտուղար Արմեն Գրիգորյանը պնդել է ավելի վաղ արած հայտարարությունը, որ Ներքին Հանդում ռուս սահմանապահները խոչընդոտել են Եվրոպական միության դիտորդների աշխատանքը:
«Ես այդ հարցին բազմիցս պատասխանել եմ, այո, նման խոչընդոտներ են եղել»,- ասել է նա:
Ավելի վաղ լրագրողների հետ զրույցում ԱԽ քարտուղարը, պատասխանելով հարցին, թե արդյոք ճի՞շտ են լուրերը, որ ԵՄ դիտորդների մուտքը Ներքին Հանդ խոչընդոտել են ռուս սահմանապահները, ասել էր. «Այդ խնդիրը կա, և մենք հասցեագրել ենք»:
ՌԴ ԱԳՆ պաշտոնական ներկայացուցիչ Մարիա Զախարովան էլ, ճեպազրույցի ժամանակ անդրադառնալով Գրիգորյանի այս հայտարարությանը, ասել էր.
«Առաջին անգամը չէ, որ Հայաստանի անվտանգության խորհրդի քարտուղարը խեղաթյուրում է փաստերը՝ ըստ երևույթին փորձելով ինչ-որ մեկին հաճոյանալ Արևմուտքում՝ փնտրելով պատճառ քննադատելու ՌԴ-ին։ Ներքին Հանդի տարածքում ռուս զինվորականներ չկան, հայկական կողմի հետ պայմանավորվածության համաձայն՝ 2021 թվականին այնտեղ տեղակայված է եղել ԱԴԾ սահմանապահ կետ։ Ավելի քան 30 տարի ՀՀ սահմանները պաշտպանող մեր սահմանապահներին նսեմացնելու փորձերը համարում ենք հակաարդյունավետ։ Ի հակադրություն, ԵՄ կեղծ դիտորդները չեն անում այն, ինչի համար այնտեղ կանչված էին։ Նրանք այնտեղ հետախուզական գործունեությամբ են զբաղվում Ռուսաստանի և Իրանի դեմ»:
Ազգային ժողովում Կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանն էլ հայտարարել էր, որ Ներքին Հանդում ռուս սահմանապահների ներկայության մանդատ և պայմանագիր գոյություն չունի։
«Եվ եթե սա նշանակում է, որ ռուս սահմանապահները այնտեղ որևէ անվտանգային գործառույթ չեն կարող իրականացնել, ենթադրվում է, որ սրանից պետք է արվեն նաև համապատասխան հետևություններ»,- ասել էր Նիկոլ Փաշինյանը:
