Առողջապահության նախարարի տեղակալներ Արտակ Ջումայանը, Արմեն Նազարյանը, նախարարի խորհրդական Շանթ Շեխերդիմյանն աշխատանքային այցով եղել են Շիրակի մարզում:
Պաշտոնյաները նախ այցելել են Գյումրու բժշկական կենտրոն, ծանոթացել կազմակերպության ընթացիկ աշխատանքներին և խնդիրներին, ծննդօգնության բաժանմունքի շենքային պայմաններին, զրուցել բուժաշխատողների հետ:
Այնուհետև Գյումրու հոգեկան առողջության կենտրոնում ոլորտի պատասխանատուները ծանոթացել են հոգեբուժական օգնության կազմակերպմանը, հոգեկան առողջության խնդիրներ ունեցող անձանց կեցության պայմաններին:
Այցը շարունակվել է Գյումրու մոր և մանկան ավստրիական հիվանդանոցում և «Արիե Կուփերսթոքի» անվան վերականգնողական կենտրոնում:
Փոխնախարարներ Արտակ Ջումայանը և Արմեն Նազարյանը, ինչպես նաև նախարարի խորհրդական Շանթ Շեխերդիմյանը եղել են նաև Գյումրու թիվ 1 պոլիկլինիկայում, ինչպես նաև Ն.Ա. Մելիքյանի անվան թիվ 2 պոլիկլինիկայում, որտեղ բուժանձնակազմի հետ զրուցել են ընթացիկ հարցերի շուրջ, ծանոթացել կազմակերպչական բնույթի խնդիրներին:
Կարևորելով մարզում բժշկական ծառայությունների որակի բարելավման անհրաժեշտությունը՝ փոխնախարարներն արձանագրել են առկա խնդիրները, ընդգծել մարզային բուժհաստատությունների և առաջնային պահպանման օղակի զարգացումն ու հզորացումը՝ որպես առողջապահության ոլորտում առաջիկա տարիների ծրագրային առաջնահերթություն:
