Աշխարհահռչակ ռոք երաժիշտ, System of a down խմբի մենակատար Սերժ Թանկյանը հրապարակել է իր նոր՝ «Electric Yerevan» («Էլեկտրիկ Երևան») երգի պաշտոնական տեսահոլովակը: Երգը տեղ է գտել «Elasticity» մինի ալբոմում:
Տեսահոլովակում ներկայացված են կադրեր 2008 թվականի մարտի դեպքերից, 2013 թվականի նախագահական ընտրությունների շուրջ ծավալված իրադարձություններից, 2015-ի «Էլեկտրիկ Երևան» անվանումը ստացած բողոքի ակցիաներից, ինչպես նաև 2016 բողոքի ցույցերից և 2018 թվականի թավշյա հեղափոխությունից: Անդրադարձ է կատարվում նաև համաշխարհային մակարդակով տեղի ունեցած դեպքերին, մասնավորապես Մոսկվայի և Մինսկի ցույցերին:
«Այն [խմբ.- երգը] գրվել է 2015 թվականին՝ ոգեշնչված Հայաստանում «Էլեկտրիկ Երևան»-ի բողոքի ցույցերից, որտեղ մարդիկ դեմ էին դուրս եկել կառավարության կողմից էլեկտրականության գների բարձրացման առաջարկին: Գնի բարձրացումը չեղարկվեց, մարդիկ հաղթող դուրս եկան»,- ավելի վաղ Թվիթերի իր միկրոբլոգում գրառում էր արել Թանկյանը: