Ընդդիմադիր «Հայաստան» և «Պատիվ ունեմ» խմբակցությունները չեն մասնակցի Ազգային ժողովի նիստերին:
«Հայաստան» խմբակցությունը հանդես է եկել ծավալուն հայտարարությամբ, որում մասնավորապես նշվում է, որ շարունակելու են կիրառել քաղաքական բոյկոտի գործիքը: «Այն է՝ չենք մասնակցելու ոչ առաջնային, հաճախ էլ արհեստական օրակարգերով լեցուն ԱԺ և նրա հանձնաժողովների նիստերին»,-ասված է հայտարարությունում:
Խմբակցությունից ընդգծել են, որ խորհրդարանական նիստերին իրենց մասնակցությունը պայմանավորված է հանրային աջակցություն ստացած օրակարգերի առաջմղմամբ: «Այն է՝
Հայաստանի ու Արցախի անվտանգությունը, օրվա իշխանությունների պաշտոնանկությունը, երկրի հզորացման ազգային-պետական ուղեգծի հաստատումը»,-նշել են հայտարարությունում:
Խմբակցությունն իր ներկայացուցիչների միջոցով շարունակելու է ակտիվ շփումներն ու աշխատանքները արտերկրի գործընկերների ու Հայաստանում հավատարմագրված դիվանագիտական ներկայացուցչությունների հետ, ինչպես նաև դրանց օգտակարությունը և արդյունավետությունը գնահատելով, մասնակցելու է միջազգային հանդիպումներին՝ երկրի շահերը պաշտպանելու, հայ ժողովրդի նկատմամբ կատարված հանցագործությունները բարձրաձայնելու և դատապարտելու համար։ Ըստ անհրաժեշտության կիրառվելու են նաև պետական ու հանրային օրակարգերը սպասարկող խորհրդարանական այլ գործիքներ:
«Միևնույն ժամանակ շարունակելու ենք ակտիվ գործունեություն իրականացնել ԱԺ-ից դուրս՝ մեր երկրին սպառնացող վտանգների մասին հանրային լայն շրջանակներին իրազեկելու, քաղաքական գործընթացներում ուղղակի մասնակցություն ապահովելու, «Դիմադրության» շարժմանը նոր թափ հաղորդելու, ներքին ու արտաքին անվտանգային քաղաքական խնդիրները լուծելու նպատակով»,-ասված է հայտարարությունում:
Խմբակցությունում նաև այն համոզմանն են, թե իշխանափոխությունն այն անհրաժեշտ նվազագույն պայմանն է, որի դեպքում է միայն հնարավոր լուծել երկրի առաջ ծառացած խնդիրները:
Ինչ վերաբերում է «Պատիվ ունեմ» խմբակցությանը, ապա դեռ մայիսից նրանց դիրքորոշումն էր չմասնակցել ԱԺ նիստերին:
«Արմենպրես»-ի հարցին՝ որոշում ունե՞ն խորհրդարան վերադառնալու հարցով՝ խմբակցության ղեկավար Հայկ Մամիջանյանն ասաց. «Եթե փոփոխություններ լինեն, մենք հանդես կգանք հավելյալ հայտարարությամբ»:
Սեպտեմբերի 12-ին մեկնարկում են Ազգային ժողովի նիստերը:
