ՀՀ Ազգային ժողովը քննարկում է Վճռաբեկ դատարանի վարչական պալատի և հակակոռուպցիոն պալատի դատավորների ընտրության հարցը:
Լրագրողների հետ ճեպազրույցի ժամանակ Վճռաբեկ դատարանի դատավորի թեկնածու Արտակ Զեյնալյանը, անդրադառնալով Ռուբեն Վարդազարյանի և Գագիկ Ջհանգիրյանի մասնակցությամբ տարածված ձայնագրությանը, նշեց՝ կարծիք չի կարող հայտնել և հավելեց, որ չի էլ լսել ձայնագրությունը:
Դիտարկմանը՝ ձայնագրության տարածումից հետո շահարկվեց այն փաստը, որ ՀՀ-ում «զանգովի» արդարադատություն է իրականացվում, հարցին՝ ինքը պատրա՞ստ է այդ արդարադատության մի մասը դառնալ, Զեյնալյանը վստահեցրեց՝ Սահմանադրության հիմնարար սկզբունքներով է առաջնորդվելու:
«Առաջնորդվելու եմ իրավունքի գերակայությամբ և խղճով, լինելու եմ ազատ: Չեմ կարող ասել՝ հիմա կա՞ զանգովի արդարադատություն, թե՞ ոչ, բայց ժամանակին եղել է»,- պնդեց նա:
Թեկնածուներից Լիանա Հակոբյանն էլ հրաժարվեց մեկնաբանել սկանդալային ձայնագրությունը. «Ձեռնպահ կմնամ այդ մասին խոսելուց: Ես թեկնածուի կարգավիճակում եմ, չեմ պատասխանի նմանատիպ հարցերի»:
ԲԴԽ անդամ Դավիթ Խաչատուրյանն էլ լրագրողների հետ զրույցում նշեց, որ բովանդակությանը գնահատական տալ չի կարող. «ԲԴԽ-ում ստեղծվել է հանձնախումբ: Խնդրել ենք պարոն Վարդազարյանին, որ ամբողջ ձայնագրությունը տրվի, որպեսզի ադեկվատ գնահատական կարողանանք տալ դրան: Մեզ անհրաժեշտ է ամբողջ տարբերակը, առանց մոնտաժման»:
Խաչատուրյանը, անդրադառնալով ձայնագրության մեջ Գագիկ Ջհանգիրյանի հնչեցրած այն մտքին, թե՝ «ինքը չի թողել, որ Վարդազարյանի նկատմամբ երկրորդ քրգործը հարուցվի», ասաց. «Այս վարկածը պետք է օբյեկտիվորեն քննարկեն համապատասխան քննչական մարմինները: Նախապատրաստվում են նյութեր: Սպասենք քրեադատավարական ընթացակարգով համապատասխան որոշումների կայացմանը»:
Հիշեցնենք՝ ԲԴԽ նախկին նախագահ Ռուբեն Վարդազարյանը վերջերս հրավիրած ասուլիսում գաղտնի ձայնագրություն էր հրապարակել և հայտարարել, թե ունի ապացույց, որ իր դեմ կատարվող «արշավն» ու ամեն ինչ քաղաքական որոշում է, ԲԴԽ-ում էլ իրեն զրկել են ապացույց ներկայացնելու իրավունքից։
Ըստ նրա՝ հրապարակված ձայնագրությամբ պարզ է դառնում, թե ինչու է ինքը դարձել թիրախ, ինչու է քաղաքական որոշում կայացվել, որ ինքը չպետք է աշխատի ԲԴԽ նախագահի պաշտոնում։ Նրա խոսքով՝ իրեն ժամանակ էր տրված մինչև 2021 թվականի մարտի 1-ը։ Եվ ձայնագրությունում հենց այդ մասին է խոսվում, որ մինչև նշված ժամանակահատվածը Վարդազարյանի դեմ չպետք է որևէ քրգործ հարուցվի, եթե նա հրաժարական տա։ Հակառակ դեպքում Ջհանգիրյանը «ոչինչ չի կարող երաշխավորել»։
Ըստ Վարդազարյանի՝ ձայնագրությունը կատարվել է 2021 թվականի փետրվարի 20-ին. զրուցում են ինքը, ԲԴԽ նախագահի պարտականությունները կատարող Գագիկ Ջհանգիրյանն ու ԲԴԽ անդամ Ստեփան Միքայելյանը։
Հիշեցնենք, որ տարածված ձայնագրության վերաբերյալ հաղորդագրություն էր տարածել ՀՀ դատախազությունը: Կառույցից հայտնել էին, որ Վարդազարյանի և Ջհանգիրյանի խոսակցության ձայնագրությունը ստուգման նպատակով ուղարկվել է ՀՀ քննչական կոմիտե: