Ուկրաինան կասետային զինամթերքով գնդակոծել է Ռուսաստանի Բելգորոդի մարզի Ուրազովո ավանը, վեց մարդ է տուժել՝ հայտնել է շրջանի նահանգապետ Վյաչեսլավ Գլադկովը:
«Ուկրաինայի զինված ուժերը «Գրադի» արկերով գնդակոծել են Վալույսկի քաղաքային շրջանի Ուրազովո ավանը։ Կասետային զինամթերքը հայտնվել է մասնավոր բնակելի տների և գյուղատնտեսական ապրանքների խանութի տարածքում։ Բոլոր տուժածները բեկորային վնասվածքներ ունեն»,- հայտնել է պաշտոնյան, հավելել՝ գնդակոծության հետևանքով վնասվել են մի քանի բնակելի տներ և ավտոմեքենաներ։
Գլադկովի խոսքով՝ Շեբեկինսկի քաղաքային օկրուգում ՀՕՊ համակարգով խոցվել է նաև ինքնաթիռային տիպի ԱԹՍ: Նախնական տվյալներով՝ տուժածներ և ավերածություններ չկան։
Նշենք, որ Ռուսական զորքերը հերթական հարվածն են հասցրել Ուկրաինայի Կուպյանսկի շրջանին, հարված է հասցվել սրճարանի, որտեղ մարդիկ են եղել: Այս մասին հայտնել է Խարկովի մարզային ռազմական վարչակազմի ղեկավար Օլեգ Սինեգուբովը:
Նշվում է, որ Պոդոլի գյուղի գնդակոծության հետևանքով 2 մարդ է զոհվել, ևս 1-ը՝ վիրավորվել:
Սինեգուբովը հավելել է, որ տեղում աշխատում են իրավապահներն ու արտակարգ ծառայությունների ներկայացուցիչները։