Սահմանադրական դատարանը գրավոր ընթացակարգով քննության առնելով Միջազգային քրեական դատարանի Հռոմի կանոնադրությունում ամրագրված պարտավորությունների՝ Սահմանադրությանը համապատասխանության հարցը որոշելու վերաբերյալ գործը՝ Սահմանադրությանը համապատասխան է համարել հիշյալ կանոնադրությունը։ Քիչ առաջ ՍԴ-ն հրապարակել է որոշումը։ Հայաստանի Հանրապետությունը Կանոնադրությունը ստորագրել է 1999 թվականի հոկտեմբերի 1-ին։ Կանոնադրությունն ուժի մեջ է մտել 2002թ. հուլիսի 1-ից: Ի դեպ, Հայաստանը նախատեսում է կանոնադրությունը վավերացնել հետադարձ ուժով՝ Միջազգային քրեական դատարանի իրավազորությունը ճանաչել 2021 թվականի մայիսի 12-ից ի վեր։
Բարձր դատարանը որոշել է, որ Միջազգային քրեական դատարանի իրավազորությունը հետադարձորեն ճանաչելու մասին հայտարարությամբ ամրագրված պարտավորությունները համապատասխանում են Սահմանադրությանը։ Որոշումը վերջնական է և ուժի մեջ է մտնում հրապարակման պահից։ ՍԴ նախագահ Արման Դիլանյանը հայտարարել է, որ հատուկ կարծիք են ներկայացրել դատավորներ Հրայր Թովմասյանը, Արայիկ Թունյանը և Երվանդ Խունդկարյանը։
2022-ի տարեվերջին այս հարցով սահմանադրական դատարան է դիմել Կառավարությունը։ Կանոնադրության ճանաչման հարցին անդրադարձը, ըստ Կառավարության, պայմանավորված է այն հանգամանքով, որ հնարավորություն է ստեղծվում Ադրբեջանին պատասխանատվության կանչելու՝ պատերազմական հանցագործությունների դեպքերով։
Չնայած Հայաստանը Հռոմի ստատուտը ստորագրել է 1999 թվականին, սակայն 2004 թվականին Հայաստանի Սահմանադրական դատարանը որոշել է, որ կանոնադրությունը մասամբ անհամատեղելի է Հայաստանի սահմանադրության հետ և չի կարող վավերացվել։
Միջազգային քրեական դատարանն աշխարհի առաջին մշտական միջազգային դատարանն է, որը հետաքննում է պատերազմական հանցագործությունները, մարդկության դեմ հանցագործությունները և ցեղասպանությունը:
Դատարանի մանդատի առանցքային նշանակությունը փոխլրացման սկզբունքն է, ինչը նշանակում է, որ Դատարանը կմիջամտի միայն այն դեպքում, եթե ազգային իրավական համակարգերը չեն ցանկանում կամ չեն կարողանում հետաքննել և հետապնդել ցեղասպանության, մարդկության դեմ հանցագործությունների և ռազմական հանցագործությունների մեղավորներին:
