«Քաղաքացիական պայմանագիր» կուսակցությունը միակն է, որն իր ներսում ընտրություններով է ձևավորում վարչություն: Բոլոր ընտրություններում էլ խնդիրներ առաջանում են, դրա համար էլ վերահաշվարկ է եղել:
Այս մասին այսօր ԱԺ-ում լրագրողների հետ զրույցում ասաց շրջակա միջավայրի նախարար Հակոբ Սիմիդյանը՝ անդրադառնալով ՔՊ վարչության ընտրությունների արդյունքների վերահաշվարկին:
Հարցադրմանը՝ ինչպե՞ս է Արսեն Թորոսյանի մոտ կասկած առաջացել, որ արդյունքները սխալ են, Սիմիդյանը նշեց՝ չգիտի, ինքը չի եղել հանձնաժողովի անդամ, հաշվարկին չի մասնակցել:
«Վերահաշվարկի կարիք է եղել, այն արվել է, արդյունքները հրապարակվել են: Մամուլում ասում են՝ կեղծվել է, ի՞նչն է կեղծվել»,- ասաց նա:
Անդրադառնալով այն դիտարկմանը, թե կուսակցությունը պառակտված է՝ Սիմիդյանը ժխտեց՝ պնդելով, թե ինքը պառակտում չի տեսնում:
Հարցին՝ ինչո՞ւ այս անգամ ինքը չընտրվեց վարչության անդամ, վերջինս նշեց՝ քիչ ձայներ է հավաքել. «Միգուցե պասիվ եմ եղել, քարոզարշավս պասիվ եմ արել»:
