Ռուսաստանի նախագահ Վլադիմիր Պուտինը նախորդ շաբաթ հեռախոսազրույց է ունեցել Հայաստանի երկրորդ նախագահ Ռոբերտ Քոչարյանի հետ: Տեղեկությունը հաստատել է ՌԴ նախագահի խոսնակ Դմիտրի Պեսկովը՝ պատասխանելով հարցին,թե արդյոք կարող է հաստատել կամ հերքել տեղեկությունը, որ Քոչարյանը Պուտինի հետ խոսել է Մոսկվա կատարած այցի ժամանակ, որտեղ եկել էր մասնակցելու «Սիստեմա» բաժնետիրական ֆինանսական կորպորացիայի տնօրենների խորհրդի նիստին:
«Ես կարող եմ հաստատել, նրանք իսկապես հեռախոսազրույց են ունեցել: Դուք գիտեք, որ նրանք վաղեմի լավ հարաբերություններ ունեն, որը շարունակվում է, նրանք բավականին հաճախ են շփվում»,- «ՌԻԱ Նովոստի»-ի փոխանցմամբ՝ լրագրողներին ասել է Պեսկովը:
Քոչարյանը «Սիստեմա» բաժնետիրական ֆինանսական կորպորացիայի տնօրենների խորհրդի անդամ է:
Ռուսական Առաջին ալիքի «Պոզներ» հաղորդմանը տված հարցազրույցում երկրորդ նախագահ Ռոբերտ Քոչարյանը երեկ հայտարարել է, որ Հայաստանին սպառնացող ամենամեծ վտանգը Թուրքիան է և դրանով բացատրել փակ սահմանն ու դիվանագիտական հարաբերությունների բացակայությունը:
Քոչարյանի համոզմամբ, սահմանի բացման դեպքում Թուրքիան կանի ամեն ինչ, որ բիզնեսում ու տնտեսությունում իր ներկայությամբ Հայաստանը վերածի Աջարիայի:
Սահմանի բացմանը դեմ հանդես եկող Ռոբերտ Քոչարյանը, մինչդեռ, ըստ WikiLeaks-ի 2011-ի հրապարակման, դեռ 2005-ին Թուրքիայի այն ժամանակվա վարչապետ Էրդողանին հղած նամակում կողմ է եղել սահմանների բացմանը. «Որպես երկու հարևաններ մենք պետք է աշխատենք ճանապարհներ գտնել միասին ներդաշնակ ապրելու համար: Ահա թե ինչու առաջին օրվանից Ձեզ պարզեցինք մեր ձեռքը՝ հաստատելու համար հարաբերություններ, բացելու սահմանը և երկխոսություն սկսելու երկու երկրների և ժողովուրդների միջև»: