ԱԺ ՔՊ խմբակցության պատգամավոր Մաթևոս Ասատրյանն անդրադարձել է օրերս Ապարանում տեղի ունեցած արյունալի միջադեպին։
Դիտարկմանը, որ ըստ մամուլի հրապարակումների՝ իր եղբայրը եղել է այնտեղ, պատգամավորն արձագանքել է. «Ես կարծում եմ՝ դուք լրագրողներ եք, ոչ թե քննիչներ, թողեք ամեն մեկն իր գործով զբաղվի: Ես հիմա զերծ կմնամ դեպքի մանրամասներին անդրադառնալոց, այդ ամբողջ կթողնեմ քննչական համակարգին: Ոչ խոչընդոտենք, ոչ էլ նպաստենք:
Քանի որ կրքերը բորբոքված են, բոլորիս համար հայտնի է, որ Ապարանը բոլորիս համար եղել է մի մեծ տուն: Այն մարդը, ով գնացել է այդ քային, կարծում եմ՝ ինքն էլ չի ցանկացել դա անել: Ես չգիտեմ ովքեր են, չեմ ճանաչում, բայց Ապարանում ոչ ոք չէր ցանկանա, և չկա մի մարդ, որ կարդացնի այդ արարքը»:
Ինչ վերաբերում է տուժածների հարազատների պնդմանը, որ իրավապահները գործը «մաքրում են», որ որևէ ՔՊ-ական կամ նրանց մտերիմ գործով չանցնի, ՔՊ-ական պատգամավորն ասաց. «Ինքս խորապես շահագրգռված եմ, որ այս ամենը բացահայտվի: Ինչով կարողանամ օգնելու եմ, որ բացահայտվի ամբողջ ճշմարտությունը: Ես ինձ համար տանը նստած, ինձ լկտիաբար քաշում են նման հարցերի մեջ: Սարքեցին քաղաքական հարց, որից հետո փորձեցին արդեն այլ մեկնաբանություններով շեղել այս ամենը»:
Հարցին, թե շարունակո՞ւմ է պնդել, որ իր ոչ մի հարազատ դեպքի վայրում չի եղել, Մաթևոս Ասատրյանը պատասխանեց. «Ոչ ես, ոչ իմ հարազատներից որևէ մեկը կապ չունեն տվյալ դեպքի հետ»: Ըստ պատգամավորի՝ իր եղբայրը եղել է դեպքի վայրում, սակայն միջադեպին չի մասնակցել. «Դա գազալցակայան է, բոլորս էլ կարող ենք լինել այնտեղ: Ձայնագրությունը կա, եթե քննչական մարմինը հարկ համարի, կհրպարակի և բոլորս կտեսնեք: Այնտեղ ծեծկռտուք չի եղել, առավելևս իմ եղբոր մասնակցությամբ: Ես չեմ տեսել, լսել եմ այնտեղ ներկաներից և հավատում եմ նրանց»: