Այսօր հրավիրված Երևանի քաղաքապետարանի գործակարգավարական արտահերթ խորհրդակցության ընթացքում Երևանի քաղաքապետ Հրաչյա Սարգսյանը հայտարարեց իր հրաժարականի մասին:
Ըստ գործող օրենքի՝ քաղաքապետի հրաժարականի դեպքում նրա պարտականությունները՝ մինչև հաջորդ քաղաքապետին՝ Երևանի ավագանու կողմից ընտրելը կատարում է առաջին տեղակալը։ Այս դեպքում՝ Լևոն Հովհաննիսյանը։ Նոր քաղաքապետը պետք է ստանա ավագանու անդամների ընդհանուր թվի ձայների մեծամասնությունը՝ ըստ օրենքի և պարտադիր պետք է լինի ավագանու անդամ։ Նորընտիր քաղաքապետն իր լիազորությունները ստանձնում է մեկշաբաթյա ժամկետում:
Հրաչյա Սարգսյանը քաղաքապետ էր ընտրվել 2021 թվականի դեկտեմբերի 22-ին ավագանու արտահերթ նիստում։ Մինչ այդ, 2018 թվականի հոկտեմբերի 29-ից նա զբաղեցնում էր Երևանի քաղաքապետի տեղակալի պաշտոնը։
