Հայաստանի դիմումի համաձայն Լաչինի միջանցքի շուրջ ստեղծված իրավիճակի հետ կապված ՄԱԿ-ի Անվտանգության խորհրդի նիստը տեղի կունենա օգոստոսի 16-ին։ Այդ մասին հայտնում են ՄԱԿ-ում ԱՄՆ մշտական ներկայացուցչությունից։
Օգոստոսի 16-ին ՀՀ արտաքին գործերի նախարար Արարատ Միրզոյանը կգտնվի Նյու Յորքում՝ մասնակցելու Ադրբեջանի կողմից լիակատար շրջափակման հետևանքով Լեռնային Ղարաբաղում հումանիտար իրավիճակի վատթարացման առնչությամբ ՀՀ պահանջով հրավիրված ՄԱԿ-ի Անվտանգության խորհրդի հրատապ նիստին։ Այդ մասին ասված է ԱԳՆ խոսնակ Անի Բադալյանի Ֆեյսբուքի էջում։
Նշենք, որ ԱՄՆ կոնգրեսական Ադամ Շիֆը Լաչինի միջանցքի ապաշրջափակման հարցում ԱՄՆ միջամտության անհրաժեշտության վերաբերյալ նամակ է ուղղել Միացյալ Նահանգների նախագահ Ջո Բայդենին։
«ԼՂ ճգնաժամը պահանջում է ԱՄՆ կողմից անհապաղ գործողություն։
Այսօր ես նախագահ Ջո Բայդենին հորդորեցի շտապ հրավիրել ՄԱԿ-ի Անվտանգության խորհրդի նիստ՝ դադարեցնելու ադրբեջանական շրջափակումը և գործածելու բոլոր հասանելի գործիքները՝ աջակցելու ԼՂ ժողովրդին և կանխելու հերթական ցեղասպանությունը»,- նամակին կից ասված է կոնգրեսականի Ֆեյսբուքի էջում։