Նոյեմբերի 15-ին Ազգային ժողովը սկսել է հերթական նիստերի աշխատանքը` հաստատելով նստաշրջանի եւ հերթական նիստերի օրակարգերը:
ԱԺ հերթական նիստին մասնակցել է նաեւ խորհրդարանական ընդդիմությունը:
Ազգային ժողովի կազմը համալրած պատգամավորներ «Պատիվ ունեմ» խմբակցությունից Մարտուն Գրիգորյանը եւ «Հայաստան» խմբակցությունից Արգիշտի Գեւորգյանը եւ Գառնիկ Դանիելյանն «ԱԺ կանոնակարգ» սահմանադրական օրենքի 33-րդ հոդվածի 4 մասի համաձայն երդվել են:
Խորհրդարանը քննարկել է ««Եվրասիական տնտեսական միությունում փոխադրումների հետագծման համար նավիգացիոն կապարակնիքների կիրառման մասին» համաձայնագիրը վավերացնելու մասին» օրենքի նախագիծը:
Հիմնական զեկուցող ՀՀ պետական եկամուտների կոմիտեի նախագահի տեղակալ Աշոտ Մուրադյանի տեղեկացմամբ` համաձայնագիրն ուղղված է ապրանքների փոխադրումների ժամանակ պետական հսկողության միջոցների կրճատմանը եւ օրինական շրջանառության ապահովմանը: Սահմանված են նավիգացիոն կապարակնիքների կիրառման պայմանները եւ կարգը, հետագծման օբյեկտների, ապրանքները տեղափոխող տրանսպորտի տեսակների, ապրանքների փոխադրումների հետագծման մասնակիցների, ազգային օպերատորների եւ հսկողական մարմինների տեղեկատվական փոխգործակցությանն առնչվող հիմնական դրույթները:
Հիմնական զեկուցողի խոսքով համաձայնագրով նախատեսված է հետագծման փուլային ներդնում` հաշվի առնելով փոխադրող տրանսպորտի տեսակները եւ ապրանքների կատեգորիաները, ինչպես նաեւ սահմանվում են հետագծման օբյեկտները, տրանսպորտի տեսակները, որոնցով դրանք փոխադրվում են, անդամ պետությունների տարածքներով փոխադրումների հետագծելիության կիրառման, ինչպես նաեւ հսկողություն իրականացնող մարմինների կողմից այդ հետագծման արդյունքների կիրառման պայմանները:
ԱԺ տարածաշրջանային եւ եվրասիական ինտեգրման հարցերի մշտական հանձնաժողովի դրական եզրակացությունը ներկայացրել է պատգամավոր Շիրակ Թորոսյանը:
