«Դիմադրություն» շարժումը վաղ առավոտից վերսկսել է անհնազանդության ակցիաները։ Մայրաքաղաքում մի շարք փողոցներ են փակվել: Վաղ առավոտից փակվել էին Հովսեփ Էմին փողոցը, Բաղրամյան փողոցի Բարեկամություն մետրոյի հատվածը, որոնք կարճ ժամանակ անց բացվել են:
Փակվել էին նաև Մաշտոցի պողոտայից դեպի օդանավակայան տանող ճանապարհը, Տերյան, Աբովյան փողոցները։ Նոր Նորքում ևս փողոցներ են փակվել, փորձել են փակել Կիևյան փողոցը: Խցանված է Արագած-Մայիսի 9-ը խաչմերուկը: Ոստիկանությունը փորձում է քաղաքացիների օգնությամբ վերականգնել երթևեկությունը։
Ոստիկանությունը բերման է ենթարկել շարժման ցուցարարներին, ովքեր փակել են Երևանի փողոցները՝ բողոքելով գործող իշխանության դեմ։
Անհնազանդության ակցիաներ իրականացնող քաղաքացիներից ոմանք պոկում էին ոստիկանների համազգեստի տարբերանշանները, հանում նրանց գլխարկները, վիրավորանքներ հնչեցնում իրավապահների հասցեին:
Կան բերման ենթարկվածներ։ Նրանց թվում է նաև Ռոբերտ Քոչարյանի որդին՝ Լևոն Քոչարյանը: Բերման ենթարկվել և ոստիկանության Մաշտոցի բաժանմունք են տեղափոխվել նաև Նաիրա Զոհրաբյանն ու Արմեն Աշոտյանը, մինչ այդ նրանք վիրավորանքներ էին հնչեցնում քաղաքացիների հասցեին, որոնք անհամաձայնություն էին հայտնում Երևանում իրականացվող գործողություններին:
