Այսօր խորհրդարանն ընտրում է ՀՀ նախագահ: Ինչպես արդեն հայտնել ենք ընդդիմադիր «Հայաստան» և «Պատիվ ունեմ» խմբակցությունները չեն մասնակցում նախագահի ընտրությանը, ինչպես նաև չեն առաջարկել իրենց թեկնածուն:
«Քաղաքացիական պայմանագիր» խմբակցության նախագահի թեկնածու, ԲՏԱ նախարար Վահագն Խաչատուրյանն իր ելույթում շնորհակալություն հայտնեց ՔՊ խմբակցության պատգամավորներին՝ այդպիսի վստահության համար:
«Վերջին անգամ ԱԺ ամբիոնից 1999-ին եմ ելույթ ունեցել։ Իմ տարիքը միգուցե այնպիսին էր, որ չպիտի հուզումնալից պահեր ապրեի, բայց, ինձ համար հուզումնալի է այս պահը։ Հույս ունեմ ձեզ հետ միասին կիրականացնենք մեր ունեցած բոլոր պատկերացումները: Մենք ուղղակի այլ ճանապարհ չունենք: Մենք կոչված ենք նրա համար, որ կարողանանք ապահովել մեր հայրենակիցների անվտանգությունը և մեր երկիրը տանել զարգացման ճանապարհով: Հաշվի առնելով իմ թվարկածները, նաև այսօրվա տարածաշրջանում տեղի ունեցող զարգացումները՝ մենք առավել ևս կարիք ունեն իմաստության, կայունության, միաբանության և վստահության: Արագ փոփոխվող աշխարհում, որտեղ մրցակցությունը տարբեր ռեսուրսների համար ավելի կտրուկ է դառնում, չափազանց կարևոր է, թե մենք ինչ պետություն ենք կարողանալու ստեղծել»,-ասաց նախագահի թեկնածուն:
Նրա խոսքով՝ իրականությունը գնահատելու համար շատ կարևոր է պատրանքներից ազատվելը, որը հնարավորություն կտա հասկանալու` քաղաքական ոչ մի համակարգ իդեալական չի լինելու:
Խաչատուրյանը նաև հավելեց՝ ՀՀ նախագահի աշխատանքը կախված է լինելու նաև իշխանության 3 թևերի աշխատանքից։