Իլհամ Ալիևը անդրադարձել է Լաչինի միջանցքում ադրբեջանական ապօրինի անցակետի տեղադրմանը՝ դա անվանելով Բաքվի կամքի և ինքնավստահության հերթական դրսևորում:
Ալիևը հավելել է, որ անցակետի տեղադրումից հետո Հայաստանը և նրա աջակիցները միջազգային տարբեր կառույցներում ճնշում են գործադրում Բաքվի վրա:
«Սակայն մեզ ոչինչ չի կարող շեղել մեր ճանապարհից: Անցակետի տեղադրումը նշանակում է մեր տարածքային ամբողջականության լիակատար վերականգնում, մենք դա արել ենք միջազգային իրավունքի շրջանակում»,- պնդել է Ադրբեջանի նախագահը։
Նա նշել է նաև, թե Ադրբեջանը որևէ երկրի տարածքային պահանջներ չի ներկայացնում:
Հավելենք, որ Թուրքիայի պաշտպանության նախարար Յաշար Գյուլերի գլխավորած պատվիրակությունը ժամանել է Ադրբեջան՝ ռազմական համագործակցության շուրջ բանակցությունների: Նրան դիմավորել է Ադրբեջանի պաշտպանության նախարար Զաքիր Հասանովը:
Այցի շրջանակներում նախատեսվում է քննարկել երկու երկրի միջև ռազմական համագործակցության տարբեր ասպեկտներ, տարածաշրջանային անվտանգության և փոխադարձ հետաքրքրություն ներկայացնող այլ հարցեր։
Ավելի վաղ, Ադրբեջանի և Հայաստանի հարաբերությունների կարգավորման ուղղությամբ տարվող աշխատանքներին, տարածաշրջանային և միջազգային մի շարք հարցերի, ռուս-ադրբեջանական հարաբերություններին Մոսկվայում անդրադարձել են Ռուսաստանի և Ադրբեջանի արտաքին գործերի փոխնախարարները:
