Արցախի Հանրապետության հռչակման 31-ամյակի առթիվ Երևանի Ֆրանսիայի հրապարակում տեղի ունեցավ «Դիմադրություն» շարժման նախաձեռնած հանրահավաքը, որի մեկնարկին ելույթ ունեցավ «Հայաստան» խմբակցության ղեկավար Սեյրան Օհանյանը և նշեց, որ օր ու գիշեր քրտնաջան աշխատանքով կարելի է միայն հասնել հաջողությունների:

«Հայաստան» խմբակցության ղեկավարը ելույթի ընթացքում կարևորեց նաև ազգային և միջազգային անվտանգության երաշխիքների ամրապնդումը:

Հանրահավաքի ընթացքում ելույթ ունեցավ նաև ՀՅԴ ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը, ով շնորհավորեց Արցախի Հանրապետության հռչակման 31-ամյակի առթիվ` ընդգծելով, որ Արցախի ազատության և անկախության համար հայ ժողովուրդը շատ է պայքարել:

Սաղաթելյանը հայտնեց, որ սեպտեմբերի 3-ի առավոտվանից սկսելու են խորհրդակցություններ Հայաստանի բոլոր քաղաքական ուժերի, վերլուծաբանների, փորձագետների հետ՝ Հայաստանը բարդ իրավիճակից դուրս բերելու համար:

Հանրահավաքը ամփոփվեց համերգով, որին հաջորդեց «Դիմադրության» շարժման աջակիցների քայլերթը: 

«Իրազեկ քաղաքացիների միավորումն» աերոնկարահանման միջոցով իրականացրել է հանրահավաքի մասնակիցների հաշվարկ, որի արդյունքում պարզվել է, որ 19:48-ի դրությամբ Ֆրանսիայի հրապարակում և հարակից տարածքներում գտնվել է շուրջ 2550 մարդ: Հաշվարկն իրականացվել է մասնակիցների անհատական հաշվարկի միջոցով։