Մայրաքաղաքի Ֆրանսիայի հրապարակում մեկնարկել է ընդդիմության հանրահավաքը: Շուրջ 2 շաբաթ ընդդիմադիր տարբեր ուժեր Երևանում և մարզերում բողոքի ակցիաներ, իրազեկման երթեր էին իրականացնում։
Հայաստանի 4 տարբեր ուղղություններից` Տիգրանաշենից, Իջևանից, Սարդարապատից, Ապարանից մեկնարկած քայլերթերի մասնակիցները այսօր հասել են Երևան և միացել մայրաքաղաքում ակցիաներ իրականացնող խմբերին։
Փողոցային պայքարին մասնակցում են ինչպես խորհրդարանական «Պատիվ ունեմ» և «Հայաստան» դաշինքների, այնպես էլ՝ ՀՀԿ-ի ներկայացուցիչներ և արտախորհրդարանական ընդդիմադիր այլ ուժեր։
Ոստիկանությունն ավելի վաղ հայտարարություն էր տարածել՝ հիշեցնելով որ ՀՀ օրենքի 30-րդ հոդվածի 1-ին մասի 1-ին կետի համաձայն՝ հավաքի մասնակիցները պարտավոր են հավաքի ընթացքում չկրել զենք կամ որպես զենք օգտագործվող առարկաներ։
ՀՀ ոստիկանությունը հորդորել է խստորեն պահպանել վերը նշված նորմի պահանջները՝ նշելով, որ դա բխում է հասարակական անվտանգության շահերից։
Նշենք, որ ցույցի մասնակիցներն այսօր որոշել են մնալ Ֆրանսիայի հրապարակում և տեղադրել վրաններ։ Վաղը 8։30-ից նախատեսված են մի շարք անհնազանդության ակցիաներ։ Այսօրվա ցույցը կշարունակվի 18։30-ից։