«Եթե Թուրքիան Հայաստանի հետ հարաբերությունների կարգավորման բանակցություններում նախապայմաններ առաջ քաշի, Հայաստանը կդադարեցնի շփումները»:
Այս մասին այսօր լրագրողների հետ ճեպազրույցում հայտնել է ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանը։
Հարցին՝ եթե Թուրքիայի հետ շփումը առանց նախապայմանների է, ինչո՞ւ Թուրքիան միակողմանի չի բացում սահմանը ՀՀ-ի հետ, Խաչատրյանն ասել է․ «Թուրքիան պատրաստակամություն է հայտնում շարունակել ներկայացուցիչների հանդիպումը, երբ նրանք կգան համաձայնության, կզեկուցեն իրենց ղեկավարությանը և կորոշեն սկսել բանակցությունները, այդ ժամանակ կքննարկվեն դիվանագիտական կապերի հաստատումը, սահմանների բացումը»։
Պատգամավորը հավելել է, որ Թուրքիայի հետ դիվանագիտական հարաբերությունների հաստատումն ու սահմանների բացումը դեռ չի նշանակում, թե Հայաստանը դադարելու է խոսել Ցեղասպանությունից։ Նրա խոսքով՝ Ցեղասպանության ճանաչման հարցում Հայաստանի դիրքորոշումը չի փոխվել։
Պատգամավորը նաև նշել է՝ ակնկալում են, որ ՀՀ-ն իր բոլոր հարևանների հետ դիվանագիտական հարաբերություններ, բաց սահմաններ կունենա:
Անդրադառնալով Արցախի իշխանությունների՝ ՀՀ իշխանությանն ուղղված կոչին՝ Վիգեն Խաչատրյանն այն որակել է զգացմունքային. «Կարծում եմ՝ Արցախի ԱԺ-ն շտապել է: Նրանք միշտ մեզ հետ քննարկելու և սեփական կարծիքն ունենալու հնարավորություն ունեն: Զգացմունքային տեսակետ հայտնեցին»: