Հունիսի 3-ին ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության ու ֆինանսավարկային եւ բյուջետային հարցերի մշտական հանձնաժողովների համատեղ նիստում քննարկվել են 2021 թ. պետական բյուջեով հատկացված միջոցների ու իրականացված ծրագրերի կատարողականները տարածքային կառավարման, բնապահպանության, շրջական միջավայրի, գյուղատնտեսության ու մի շարք այլ ոլորտներում:
ՀՀ ֆինանսների նախարար Տիգրան Խաչատրյանը ներկայացրել է վերոնշյալ ոլորտների ֆինանսական հատկացումներն ու իրականացրած միջոցառումները:
Այսպիսով, 2021 թ. Շրջակա միջավայրի նախարարությունն իրականացրել է 6 ծրագիր` 31 միջոցառմամբ: Փաստացի տրամադրվել է 7 մլրդ 213 մլն դրամ: Կատարողականը կազմել է 78,6 տոկոս, որը նախորդ տարվա համեմատ ավելի է 7,7 տոկոսով:
Էկոնոմիկայի նախարարությունն ունեցել է 14 ծրագիր` 71 միջոցառմամբ, տարեկան պլանը փաստացի կազմել է 43 մլրդ 390,5 մլն դրամ, կատարողականը` 94,9 տոկոս, նախորդ տարվա համեմատ 27,6 տոկոսով ավելի:
2021 թ. համայնքների բյուջեին հատկացվել է 115,5 մլրդ դրամ, որը նախորդ տարվանից ավելի է 6,8 տոկոսով, կատարողականը կազմել է 97,2 տոկոս:
Հաշվետու տարում մարզպետարաններին հատկացվել է 5 մլրդ 475,5 մլն դրամ, կատարողականը` 98,6 տոկոս:
ՀՀ շրջակա միջավայրի նախարար Հակոբ Սիմիդյանը նշել է, որ նախարարության ապարատի ու ծրագրերի իրականացման գրասենյակի պահպանությանը, այդ թվում` տեխնիկական կարողությունների ընդլայմանն ուղղված ընդհանուր հատկացումը 2021 թ. կազմել է 1 մլրդ 57,3 մլն դրամ: Համակարգի 9 ՊՈԱԿ-ի ֆինանսավորումը կազմել է 3 մլրդ 115,3 դրամ, այդ թվում` բնության հատուկ պահպանվող տարածքների կառավարում իրականացնող 6 ՊՈԱԿ-ին 1 մլրդ 27 մլն դրամ, որը հիմնականում ուղղվել է պահպանություն իրականացնող աշխատակիցների աշխատավարձերի վճարմանը եւ պահպանման ծախսերին:
