«Տարիներ առաջ նաեւ թռչնարտադրության ոլորտին զարկ տալու համար կարեւորվեց եգիպտացորենի մշակության զարգացումը: Գյուղատնտեսության նախկին փոխնախարար Գառնիկ Պետրոսյանը, ով զբաղվել է այդ խնդրով (եգիպտացորենի մշակության), ինչպես նախկինում, այսօր էլ համոզված է, որ եգիպտացորենի մշակությունը Հայաստանին խիստ անհրաժեշտ է:
«Մենք մեր երկրում թռչնաբուծությունը զարգացնելու շատ մեծ հնարավորություն ունենք: Խորհրդային վերջին տարիներին թռչնի մսով ու ձվով ինքնաբավ երկիր էինք: Մինչդեռ մի ժամանակահատված կար, որ դրսից բերվող գունավոր փաթեթներով թռչնի մսի համար մետրերով հերթեր էին: Անկախությունից հետո շրջան եղավ, որ մասամբ վերականգնեցինք թռչնաբուծության ոլորտը:
Բայց վերջին 5-6 տարիներին նվազեց ոլորտի տեմպը: Մինչդեռ մենք հսկայական հնարավորություններ ունենք այս բնագավառը զարգացնելու ե՛ւ խոշոր, ե՛ւ միջին հատվածներում: Բայց դրա համար նախ պետք է կերի հարցը լուծենք: Ներմուծում ենք՝ հասկանալի հետեւանքներով հանդերձ. թանկանում է ինքնարժեքը՝ տնտեսապես ոչ ձեռնտու դառնալով:
Սակայն կարող ենք տեղական կերարտադրություն կազմակերպել: Եվ սրա բոլոր հնարավորություններն էլ ունենք: Որովհետեւ կերի մեջ տեսակարար մեծ կշիռ է կազմում եգիպացորենը, որի պահանջարկի 90 տոկոսը ներկրում ենք»,- պարզաբանեց Գառնիկ Պետրոսյանը»:
