Վարչապետ Նիկոլ Փաշինյանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ: Վարչապետը մանրամասներ է ներկայացրել Ադրբեջանի կողմից Հայաստանի ինքնիշխան տարածքի նկատմամբ ձեռնարկվող ագրեսիայի առնչությամբ:
Նիկոլ Փաշինյանը տեղեկացրել է, որ տեղի ունեցող գործողությունների հետ կապված որոշում է կայացվել պաշտոնապես դիմել Ռուսաստանի Դաշնությանը՝ Բարեկամության, համագործակցության և փոխադարձ օգնության պայմանագրի դրույթները գործողության մեջ դնելու նպատակով, Հավաքական անվտանգության պայմանագրի կազմակերպությանը և ՄԱԿ-ի Անվտանգության խորհրդին:
Այս համատեքստում, վարչապետ Փաշինյանը միջազգային հանրության համարժեք արձագանքի հույս է հայտնել:
Էնթոնի Բլինքենն ամերիկյան կողմի խոր մտահոգությունն է արտահայտել ստեղծված իրավիճակի կապակցությամբ և անթույլատրելի համարել իրադրության հետագա լարումը:
Նա ԱՄՆ պատրաստակամությունն է հայտնել ջանքեր գործադրել իրավիճակը կայունացնելու ուղղությամբ:
ԱՄՆ պետքարտուղարությունը հայտարարություն է տարածել Ադրբեջանի սանձազերծած ագրեսիայի վերաբերյալ: ԱՄՆ պետքարտուղար Էնթոնի Բլինքենը կոչ է արել անհապաղ դադարեցնել Հայաստանի և Ադրբեջանի միջև ռազմական գործողությունները:
«Միացյալ Նահանգները խորապես մտահոգված է հայ-ադրբեջանական սահմանի երկայնքով հարձակումների մասին հաղորդագրություններով, այդ թվում ՝ Հայաստանի ներսում քաղաքացիական ենթակառուցվածքների և բնակավայրերի ուղղությամբ հարվածների մասին հաղորդագրություններով։ Ինչպես արդեն հստակեցրել ենք՝ հակամարտության ռազմական լուծում չի կարող լինել: Կոչ ենք անում անհապաղ դադարեցնել ցանկացած ռազմական գործողություն»,- ասված է հայտարարության մեջ:
