Երեկ Նիգավանում վիճաբանություն և կրակոցներ են եղել, ինչի հետևանքով կա սպանված: Ընդհանուր առմամբ վիրավորում է ստացել 7 տղամարդ, որոնցից մեկը քիչ ուշ մահացել է: Կատարվածի առնչությամբ հաղորդագրություն է տարածել ՀՀ ոստիկանությունը՝ նշելով.
«Նիգավանում կենցաղային հարցի շուրջ ծագած վեճի արդյունքում են հնչել կրակոցներ: Հունիսի 19-ին' ժամը 19.45-ի սահմաններում, Արագածոտնի մարզի Նիգավան գյուղում մի խումբ անձանց մասնակցությամբ միջադեպ է տեղի ունեցել։ Այդ ընթացքում հնչել են կրակոցներ, նախնական տվյալներով' գործադրվել է որսորդական հրացան: Տուժած յոթ տղամարդիկ տեղափոխվել են տարբեր բժշկական կենտրոններ: Նրանցից մեկը մահացել է: Դեպքի առթիվ քրեական գործ է հարուցվել, որի շրջանակներում ձեռնարկվում են օպերատիվ-հետախուզական ծավալուն միջոցառումներ: Տեղեկացնում ենք, որ միջադեպը քաղաքական ենթատեքստ չի պարունակում, ավելին' պատճառը կենցաղային է: Դեպքին առավել մանրամասն կանդրադառնանք առաջիկայում»:
Նշենք, որ ոստիկանությունն իր հաղորդագրության մեջ անդրադարձել և փաստացի հերքել է լրատվամիջոցներով տարածվող տեղեկություններին այն մասին, որ կրակոցներ հնչել և վեճ տեղի է ունեցել «Քաղաքացիական պայմանագիր» խմբակցության պատգամավոր Մաթևոս Ասատրյանի հարազատների, Արագածոտնի փոխմարզպետ Էդգար Փարվանյանի հորեղբոր որդու և ապարանցի մի խումբ երիտասարդների միջև, ինչի հետևանքով վերոնշյալ մարդիկ կրակել են երիտասարդների վրա։ Միջադեպին անդրադարձել է նաև ինքը պատգամավորը, ում անունը շրջանառվում է որպես զինված բախման մասնակից կողմ: Մաթևոս Ասատրյանն իր ֆեյսբուքյան էջում հերքել է իր մասնակցությունը զինված միջադեպին ու կրակոցներին՝ նշելով.
«Հարգելի քաղաքացիներ, հայտնում եմ, որ արդեն մի քանի ժամ մամուլում և որոշ անբարոյական քաղաքական գործիչների կողմից տարածվող լուրերը, թե ես կամ իմ ընտանիք անդամները մասնակցել ենք ժամեր առաջ տեղի ունեցած ողբերգական դեպքին, բացարձակ սուտ են և աղերս չունեն իրականության հետ։ Ակնհայտ է, որ մարդասպանությունը նվիրական հավատամք դարձրածները այս սուտ լուրերով փորձում են հավասարության նշան դնել մեր և իրենց միջև։ Չի՛ հաջողվելու, սրիկաներ։ Ցավակցում եմ մահացածի հարազատին, ապաքինում եմ մաղթում վիրավորներին, վստահ եմ՝ շուտով գործն ամբողջությամբ կբացահայտվի։ Խոհեմություն բոլորիս»։