Օգոստոսի 17-ին ԱՄՆ-ում ՀՀ դեսպան Լիլիթ Մակունցը և ՀՀ-ում ԱՄՆ դեսպան Քրիստինա Քվինը համատեղ այցելել են Վայոց ձորի մարզ։
Ինչպես տեղեկացնում են ԱՄՆ-ում ՀՀ դեսպանությունից՝ այցի ընթացքում տեղի են ունեցել հանդիպումներ Վայոց ձորի մարզպետ Արարատ Գրիգորյանի, Ջերմուկ համայնքի ղեկավարի առաջին տեղակալ Վարդան Սարգսյանի, ԵՄ դիտորդական առաքելության ներկայացուցչի, ինչպես նաև ՀՀ ԶՈՒ ներկայացուցիչների հետ։
Դեսպանները ծանոթացել են մարզի անվտանգային իրավիճակին, առկա խնդիրներին, ինչպես նաև քննարկել են երկկողմ հետաքրքրություն ներկայացնող այլ հարցեր։
ՀՀ-ում ԱՄՆ դեսպան Քրիստինա Քվինը Վայոց ձորի մարզում էր՝ հանդիպելու տեղի պաշտոնատար անձանց և դիտարկելու անվտանգային իրավիճակը հայ-ադրբեջանական սահմանին։
«Դեսպանը հանդիպեց Վայոց ձորի մարզպետի, ԵՄ դիտորդական առաքելության և տեղի զինված ուժերի ներկայացուցիչների հետ։ Հանդիպումներին ներկա էր ԱՄՆ-ում ՀՀ դեսպան Լիլիթ Մակունցը։ Դեսպան Քվինն ընդգծեց, որ Միացյալ Նահանգները հանձնառու է աջակցել Հայաստանի ինքնիշխանությանն ու անվտանգությանը, ինչպես նաև Հարավային Կովկասում տևական խաղաղության հաստատմանը»,- ասված է ՀՀ-ում ԱՄՆ դեսպանության տարածած հաղորդագրության մեջ։
