Ֆրանսիայից ուղարկված AstraZeneca պատվաստանյութի 25000 դեղաչափ պարունակող առաջին խմբաքանակն այսօր վաղ առավոտյան հասել է Երևանի «Զվարթնոց» միջազգային օդանավակայան:

 

Օդանավը դիմավորել են Հայաստանում Ֆրանսիայի դեսպանության գործերի ժամանակավոր հավատարմատար պարոն Քրիստոֆ Քացախյանը, առողջապահության և արտաքին գործերի նախարարությունների ներկայացուցիչները:

 

ՀՀ իշխանությունների հետ համակարգմամբ պատվաստանյութի մնացած առաքումները կշարունակվեն վաղը և գալիք շաբաթների ընթացքում:

 

Ֆրանսիան Հայաստանի կողքին է՝ համաճարակին դիմագրավելու գործում: Ֆրանսիան 2020 թվականին մասնագետ բժիշկների երեք առաքելություն է ուղարկել Հայաստան, իսկ 2021 թվականի օգոստոսի 3-ին նախագահ Էմանուել Մակրոնը հայտարարեց 200000 դեղաչափ պատվաստանյութի նվիրատվության մասին:

 

Ֆրանսիայի նախագահ Մակրոնն այդ առիթով հայտարարել էր. «Հայերն անցնում են բազում փորձությունների միջով։ Բարեկամաբար և համերաշխությամբ դիմում եմ նրանց՝ Ֆրանսիան միշտ ձեր կողքին կլինի։ Համավարակին դիմակայելու համար Ֆրանսիան պատրաստ է պատվաստանյութի 200000 դեղաչափ ուղարկել Երևան: Միասին մենք կհաղթահարենք համավարակը»։