Արցախում (Լեռնային Ղարաբաղում) տեղակայված ռուս խաղաղապահների միջոցով 14 տոննա հումանիտար օգնություն ուղարկելով Ուկրաինայում ռազմական գործողությունների հետևանքով կարիքավոր դարձած մարդկանց համար՝ Արցախի կառավարությունը ցույց է տալիս իր պատրաստակամությունը կանգնելու այն մարդկանց կողքին, որոնք առերեսվում են նույն աղետալի զրկանքներին, ինչ մենք՝ ադրբեջանա-թուրքական ագրեսիայի ժամանակ:
Այս մասին տելեգրամյան իր ալիքում գրառում է կատարել ԱՀ պետական նախարար Արտակ Բեգլարյանը։
1․ անկախ մեր տևական ու ծանր զրկանքներից և աշխարհի գրեթե լրիվ անտարբերությունից դրանց նկատմամբ՝ մենք մարդ ենք և չենք ցանկանում տեսնել մարդկային նման տառապանք որևէ տեղ, ներառյալ՝ Դոնբասում, Կիևում, Ռուսաստանում:
2․ Անկախ Արցախի Հանրապետության չճանաչված կարգավիճակից՝ մենք միջազգային հանրության պատասխանատու և լիիրավ անդամ ենք՝ մեր պարտականություններով ու իրավունքներով հանդերձ:
3․ Թեև 14 տոննան շատ մեծ ծավալ չէ, սակայն դա քիչ չէ մեր հնարավորությունների համեմատ: Եվ չենք բացառում նոր հումանիտար բեռների առաքումը ռուս խաղաղապահների միջոցով՝ ըստ կարիքի ու մեր հնարավորությունների:
4․ Մարդու իրավունքներն ու արժանապատվությունը պետք է ոչ մեկի կողմից չենթարկվեն բազմակի ստանդարտների: