Այս գիշեր վնասվել է ՀՀ-ից Արցախ եկող գազատարը: Դեպքը տեղի է ունեցել ադրբեջանական դիրքի մոտ: Այս պահին ադրբեջանական կողմը խոչընդոտում է վերանորոգման աշխատանքներ սկսելուն։ Այս մասին հայտնում են Արցախի տարածքային կառավարման և ենթակառուցվածքների նախարարությունից: Նշվում է, որ ռուսական խաղաղապահ առաքելության միջնորդությամբ բանակցություններ են ընթանում վաղը աշխատանքները սկսելու համար:
Արցախում մայրուղային գազատարը վնասվել է, ինչի հետևանքով խափանվել է գազամատակարարումը: Այս մասին հայտնում է «Արցախգազ» ՓԲԸ-ից: ««Արցախգազ» ՓԲԸ-ն գազասպառող բաժանորդներին իրազեկում է, որ վթարը տեղի է ունեցել գիշերը՝ ժամը 01:00-ի սահմաններում, ինչի հետևանքով վնասվել է մայրուղային գազատարը։ Ընկերության փորձագետների կողմից կատարվում է ուսումնասիրություն՝ գազամատակարարումը հնարավորինս արագ վերականգնելու համար»,- ասված է հաղորդագրությունում։
