ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանն այսօրվա ասուլիսի ընթացքում անդրադարձավ Արցախում տիրող իրավիճակին:
«Տեղի ունեցողն Ադրբեջանի կողմից հետևողականորեն իրականացվող՝ արցախահայությանը իրենց հայրենիքում ապրելու իրավունքից զրկելու, ԼՂ հայության էթնիկ զտման հերթական դրսևորում է, որի ականատեսն ենք: Մասնավորապես, հետպատերազմյան ժամանակահատվածում այս գործընթացը ձեռք է բերել առանձնահատուկ և գործնական տեսք, որի մասին ՀՀ իշխանությունները տեղեկացրել են ու ահազանգել միջազգային հանրությանը»,- ասաց Աղաջանյանը:
Աղաջանյանն ընդգծեց, որ խոսքը ռուս խաղաղապահների պատասխանատվության տիրույթում գտնվող տարածքի մասին է:
«Փաստացի, այս առաջխաղացման արդյունքում Ադրբեջանի զինված ուժերը հայտնվել են ռուս խաղաղապահների թիկունքում, այսինքն՝ շրջանցել են նրանց: Մեր ակնկալիքն է՝ ստանալ պատասխաններ մեր ռուս գործընկերներից, թե ինչ պայմաններում և ինչի արդյունքում է տեղի ունեցել: Ակնկալում ենք, որ ամենասեղմ ժամկետներում այս խնդիրը կվերացվի, և ադրբեջանական զինված ուժերը կվերադառնան այն ելման դիրքեր, որտեղից առաջխաղացումը տեղի է ունեցել»,- ասաց Աղաջանյանը:
Աղաջանյանը նշեց, որ, որպես ԱԺ արտաքին հարաբերությունների հանձնաժողովի նախագահ, ինքն ակնկալում է գործնական արդյունք, որով կարձանագրվի ռուս խաղաղապահների մանդատի իրացումը, և որով կբացառվեն վերջիններիս պատասխանատվության գոտում նմանատիպ սադրանքները:
«Կարծում եմ, որ առնվազն սպառված չէ ռուս խաղաղապահների արդիականությունը վերջիններիս պատասխանատվության ներքո գտնվող տարածքում: Կարծում ենք, որ վերջիններիս հետ հնարավոր է լուծումներ գտնել ու հասնել այն կետին, որ եռակողմ հայտարարության դրույթներից բխող պարտավորությունները բոլոր կողմերն իրականացնեն, այդ թվում՝ ռուս խաղաղապահները»,- ասաց Աղաջանյանը:
ԱԺ արտաքին հարաբերությունների հանձնաժողովի նախագահ Էդուարդ Աղաջանյանին լրագրողներից մեկը հարց ուղղեց, թե որքանով է նա փոխկապում հետևյալ փաստերը, որ Բաքուն Հայաստանի հետ հարաբերությունների կարգավորման վերաբերյալ 5 կետանոց առաջարկներ ներկայացրեց, Հայաստանն այդտեղ անընդունելի ոչինչ չտեսավ, ու այնուհետև սկսվեցին Արցախում ադրբեջանական կողմի սադրանքները:
«ՀՀ արտգործնախարարի հայտարարության օրը ադրբեջանական կողմը ևս մեկ անգամ փակում է գազը: Սա խոսուն օրինակ է, որ խաղաղության օրակարգը, որի սպասարկմանը միտված է ՀՀ կառավարության և իշխանության գործունեությունը, որևէ կերպ չի կիսվում ադրբեջանական կողմից, չնայած որ հրապարակային խոսույթում Ադրբեջանը միջազգային հանրության առաջ ներկայանում է որպես խաղաղության հաստատման ջատագով: Գործնական տեսնում ենք լրիվ հակառակ գործողություններ»,- նշեց Աղաջանյանը:
Աղաջանյանի համոզմամբ՝ խաղաղության օրակարգը բխում է Հայաստանի ու հայ ժողովրդի շահերից:
«Մեր խնդիրն է՝ որևէ պարագայում չշեղվել այդ օրակարգից: Այն, ինչ տեղի է ունենում, գնահատում ենք որպես սադրանք և գործողություններ՝ միտված ամեն կերպ արժեզրկելու այդ խաղաղության օրակարգը, որի կարևորության մասին ՀՀ կառավարությունը բազմիցս խոսել է»,- ասաց պատգամավորը:
ՀՀ ԱԺ-ից հայտնում են, որ արտաքին հարաբերությունների մշտական հանձնաժողովի նախագահ Էդուարդ Աղաջանյանը մարտի 25-ին ընդունել է ՀՀ-ում Ֆրանսիայի Հանրապետության արտակարգ և լիազոր դեսպան Անն Լույոյին:
Էդուարդ Աղաջանյանը շնորհակալություն է հայտնել բարեկամ Ֆրանսիային՝ հատկապես ՀՀ անկախության ձեռք բերումից հետո բազմաթիվ հարցերում մեր երկրին ու հայ ժողովրդին մշտապես աջակցելու համար: Այս համատեքստում հանձնաժողովի նախագահն ընդգծել է Ֆրանսիայի խորհրդարանի երկու պալատների կողմից Արցախի դեմ ադրբեջանաթուրքական ագրեսիան դատապարտող և Լեռնային Ղարաբաղի Հանրապետության ճանաչման վերաբերյալ բանաձևերն ու կոչերը:
Խոսելով երկկողմ փոխգործակցությունից` կողմերը փաստել են, որ Հայաստանի և Ֆրանսիայի միջև համագործակցությունը բարձր մակարդակի վրա է: Այս համատեքստում Էդուարդ Աղաջանյանը կարևորել է Հայաստանի և Ֆրանսիայի միջև դիվանագիտական հարաբերությունների հաստատման 30-ամյակին նվիրված` «Հավակնություններ՝ Հայաստան-Ֆրանսիա» համաժողովի անցկացումը, որին մասնակցել է ՀՀ վարչապետ Նիկոլ Փաշինյանի գլխավորած պատվիրակությունը:
Որպես ԱԺ Հայաստան-Ֆրանսիա բարեկամական խմբի անդամ` Էդուարդ Աղաջանյանը արժևորել է բարեկամական խմբերի արդյունավետ համագործակցության զարգացումը:
Անդրադառնալով տարածաշրջանային զարգացումներին` հանձնաժողովի նախագահը ներկայացրել է Ադրբեջանի կողմից Լեռնային Ղարաբաղի շփման գծի խախտման և Արցախի Փառուխ գյուղ ներխուժման հետևանքով ստեղծված իրավիճակը: Էդուարդ Աղաջանյանի խոսքով` Ադրբեջանի սադրիչ գործողությունները վտանգում են տարածաշրջանային կայունությունը և խաղաղությունը, ինչպես նաև Ադրբեջանը կոպտորեն խախտում է եռակողմ հայտարարություններով ամրագրված պարտավորությունները:
Հանձնաժողովի նախագահը նշել է, որ օրակարգային կարևորագույն խնդիրներից է ռազմագերիների և այլ գերեվարված անձանց վերադարձը հայրենիք, որը մարդասիրական խնդիր է:
Դեսպանը վերահաստատել է, որ երկու երկրների իշխանությունների միջև առկա է արդյունավետ երկխոսություն: Անն Լույոն խոսել է խորհրդարանների միջև համագործակցության խորացման կարևորության մասին, բարձր գնահատել Հայաստանում ժողովրդավարացման գործընթացը: