Ռուսաստանն արդեն հայկական կողմից պարզաբանումներ է խնդրել Հռոմի ստատուտը վավերացման նպատակով ՀՀ Ազգային ժողով ուղարկելու վերաբերյալ։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Հետագա քայլերը կորոշենք՝ ելնելով Երևանի պատասխանից»,- հավելել է Զախարովան։
ՌԴ ԱԳՆ պաշտոնական ներկայացուցիչ Մարիա Զախարովան, անդրադառնալով Սոթքի ուղղությամբ Ադրբեջանի վերջին ագրեսիային, կողմերին կոչ է արել զերծ մնալ այնպիսի գործողություններից, որոնք կարող են հանգեցնել լարվածության նոր սրացման և զոհերի։
«Տվյալ ողբերգական միջադեպը ևս մեկ անգամ ցույց տվեց Հայաստանում տեղակայված եվրոպական դիտորդների աշխատանքի ցածր արդյունավետությունը: Պահանջված ենք համարում պարբերական, ակտիվ աշխատանք իրականացնել հայ-ադրբեջանական սահմանի սահմանազատման և սահմանագծման ուղղությամբ՝ ռուսական խորհրդատվական աջակցությամբ՝ միաժամանակ վստահության ամրապնդման միջոցների ձեռնարկմամբ»,- նշել է Զախարովան։
Նրա խոսքով՝ Մոսկվան հանդես է գալիս սահմանին ՀԱՊԿ-ի առաքելության տեղակայման օգտին․ կազմակերպության մյուս անդամները պատրաստակամություն են հայտնել այդ կապակցությամբ։ «Գնդակը Երևանի դաշտում է»,- հավելել է ՌԴ ԱԳՆ խոսնակը։
Ռուսաստանը տարբեր երկրների հետ իր խնդրահարույց հարցերը լուծում է երկկողմ խողովակներով։ Այդ մասին նշել է ՌԴ ԱԳՆ պաշտոնական ներկայացուցիչ Մարիա Զախարովան՝ ճեպազրույցի ժամանակ անդրադառնալով Ադրբեջանի կողմից Ուկրաինային բացահայտ աջակցություն ցուցաբերելու վերաբերյալ հարցին։
«Լինում են իրավիճակներ, երբ ոչ բարեկամական երկրներն արգելափակում են շփումները, հրաժարվում են երկխոսությունից։ Դա չի վերաբերում Ադրբեջանի հետ մեր երկխոսությանը: Ուստի հարցերը լուծում ենք երկկողմ ձևաչափով»,- ասել է Զախարովան:
